Messi kan dang thei a, Kane kan dang thei ang - Dalic

Croatia coach Zlatko Dalic chuan England nena World Cup semifinal an khelh tur a thlir lawk a, Lionel Messi an dah 'nil' tawh avangin a player te chu Harry Kane dang chat tura an ṭhat tawk thu a sawi.

Dalic chuan, "Kane hi top scorer ni lai a ni a, kan tan dan a harsa dawn. Mahse, centre back ṭha tak tak kan nei. Messi kan dang thei a, Christian Eriksen pawh kan dang. Kane pawh hi kan dan theih ka beisei a ni," a ti.

Kum 51 mi coach hi England chak lohna lai zawh a ni a, a chhanna tur erawh a hre lo! Dalic chuan, "Chak lohna lai an neih ka hre lo. Semifinal an thleng a, hei hian he team dinhmun hi a hrilhfiah a ni.

"England inkhel ka en chinah an tlan tam a, an tlan chak bawk. Set piece-ah an ṭha em em a, corner thlengin a hlauhawm em em vek a ni," a ti a, final lut turin fimkhur a ṭul tih a hai lo.

Top Scorer Kane?

FIFA World Cup quarterfinal-ah Kane-a'n goal khung lo mah se goal ruk khung tawh Kane hi top scorer a la ni zel.

Tottenham striker Kane hnaih bertu Romelu Lukaku chuan goal li a khung a, Russian midfielder Denis Cheryshev-a'n hetiang zat bawk hi rawn khung ve mah se Croatia hneh loa an tlak tak avangin beisei tur a nei tawh lo.

Kane elpha thei tura ngaih chu Lukaku bakah Antoine Griezmann leh Kylian Mbappe te an ni a, France forward pahnih hian goal thum ve ve an khung tawh bawk.

A tehfung

Goal khung tam ber hnenah Golden Boot chawimawina pek a ni ṭhin. Goal khung zat inang player pahnih emaw a aia tam an awm a nih chuan assists

(ṭhiante goal khung tur siam sak) zat chu en leh tur a ni a, hetah pawh hian chinfel theih a nih loh chuan minute khel tlem zawk hnenah Golden Boot chawimawina hi hlan tur a ni.

Kum 2010 khan Germany forward Thomas Muller, Spain forward David Villa, Netherlands midfielder Wesley Sneijder leh Uruguay forward Diego Forlan ten goal nga vek an khung a; assists vawi thum neitu Bayern Munich forward Muller chuan Golden Boot chawimawina a dawng.