Mario-a'n ngaihdam a dil

Russia tana Croatia laka penalty pet goal lotu Mario Fernandes chuan a tihsual avangin a ṭhiante hnenah ngaihdam a dil a, hrehawm a tih thu a sawi.

Brazil-a piang leh seilian, Russian club ṭha CSKA Moscow tan kum nga a khelh tlin hnua khua leh tui nihna an pek avanga Russia tana inlan Mario chuan, "Kan team pumpui hnenah ngaihdam ka dil a, ka tihsual tih ka hria a ni.

"Mipa ka nihna ang takin ka tihsual chu ka pawm ngam a ngai a, kha penalty luh loh chhanah khan mawhphurtu chu keimah ka ni. Mahse, thil thleng tur chu a thleng zo tawh a, tih theih ka nei lo," a ti.

Mario hian amah ang thoa penalty pet goal lo Fyodor Smolov a hnem thu sawi nghalin, "A bulah ka kal a, rilru ti hrehawm lo turin ka hrilh. Mi tupawhin tihsual chu kan nei thei vek a ni," a ti a, a ṭhianpa chu hahdam taka awm turin a duh.

Kum 27 mi right back hian quarterfinal-ah khan Russia tan inkhel bul ṭanin minute 115-naa an si phurh a sutna goal chu Russia-in penalty an thlen theih chhan a ni.

Mahse, kum 2014-a Brazil tana friendly match vawi khat lo khel ve zuai tawh defender hian a team tana hun duhawm a siam chu a hrehawm tihnaah a chang ta zawk a, penalty chhuih lut loin Croatia lakah 4-3 in an tlawm.