China-ah Paulinho a kir dawn

Brazil midfielder Pau­linho chuan transfer bazar-ah rin loh lam aṭang­in thawm a nei a, ni­kum lawka a chhuahsan Chinese Super League club Guangzhou Ever­grande chu season khat chhung atan loan-in a zawm.

Kum 29 mi midfielder hian season hmasa ṭan dawn khan CSL chhuah­sanin Barcelona a zawm a, Catalan club hian a man zat atan pound maktaduai 36 bawr vel an inseng hial.

Paulinho hian Spain-a a season hmasa berah hun duhawm tak hmangin La Liga leh Copa del Rey-ah nomawi an chawi a, Ca­talan club tan inelna hrang hrangah match 49 khelin goal kua ngawt a khung.

Tottenham Hotspur midfielder hlui hian sea­son hmasaa Barcelona tan a khelh hma khan tuna a pan leh tak Guangzhou-ah hian season thum chhung a khel hman a, China-a a khelh lai pawh hian Brazil coach Tite-a'n a squad-ah a koh hmaih ngai lo.

Guangzhou hian loan hmanga an player hlui lak let nan hian pawisa an seng em hriat a ni lo a, hetihrual hian season tawp ruala a ngheta an la let leh duh dawn a nih chuan pound maktaduai 44.2-in Paulinho hi an lei thei ang.