Rohit Sharma thiamna hmangin India chak

India chuan Twenty20 interna­tional series-a match hnuhnung berah England chu wicket sarih ngawt­in an sawp a, series hi 2-1 in an la.

India tan Rohit Sharma chu player langsar a ni a, kum 31 mi batsman hian century vaw chhuakin a tawp thleng a dam - Virat Kohli chuan run 43 a siam ve bawk.

Bristol-a inkhelah hian mual­neitu England an bat hmasa zawk a, opener Jason Roy chuan run 67 ngawt a rawn siam nghal avangin England dinhmun a ṭha a, over 20-ah run 198 siama wicket kua an hloh chu ṭha pangngai tak a ni.

India bat hun a thleng a, Shikhar Dhawan chu run nga lek siamin out mah se a dinchhuahpui hmasa berah Rohit a ṭang tlat a, over 18.4 lekah wicket thum hloh chungin India chu hnehna a chanpui.

Men in Blue (India sawina) tan hian Hardik Pandya chuan run 33 siamin a tawp thleng a dam ve bawk a, Rohit Sharma chet ṭhat piahna lamah team thawhhona ṭha chu an chakna hnar a ni.

India hian Ningani zan aṭanga khelh ṭan turin England nen hian ODI series match thum an khel leh dawn a, July 17-ah match hnuhnung ber khelin August 1-ah test series match nga an khelh tura match hmasa ber an khel leh ang.