Trump-a'n US soccer leh NFL en a tum lo

United States president Donald Trump chuan American football tia hriat lar inelna sang NFL leh US soccer chu hnam hla sak laia ṭhingṭhit an thlawp a nih chuan a en loh tur thu a sawi a, an ram hotu lu ber thusawi hi NFL leh US soccer hian eng ang takin nge an dawnsawn dawn, tih chu hriat a châkawm hle. 

NFL hian kar hmasa khan player-te chu hnam hla sak laia an ṭhingṭhit phalsak an nih tur thu an sawi a, tun hmaa player-te thusawi an lo ngaithla tawk lo chu pawi an tih thu an sawi bawk. 

Ningani khan US Soccer chuan hnam hla sak laia player-te an ṭhing

ṭhita hrem theihna dan an neih chu an hlip bawk a, Donald Trump tan hei hi thu hriat nuam a ni lo. 

Kum 2016 khan NFL star Colin Kaepernick chuan vun rawng inthliarna awm ṭhin a duh lohzia entir nan inkhelh hmaa hnam hla play a nih laia ṭhingṭhit hi a tichhuak a, US hmeichhe football star Megan Rapinoe chuan hei hi a lo zawm ve tawh bawk. 

US Soccer chuan Rapinoe-i a ṭhingṭhit hnuah hian hnam hla sak laia player ṭhingṭhite chu hrem theih an nih thu an sawi a, mahse he thu hi kar hmasa khan zuk lehin, "Kan thutlukna hmasaah khan kan tisual tih kan hria a ni," an ti. 

NFL hian May 2018 khan hnam hla sak laia ṭhingṭhit hi hrem turin hma an la a, hnam hla sak laia player an ṭhingṭhit chuan team-in pawisa an chawi theih thu an sawi - he dan hi thla hnih hnuah hman rih loh turin an titawp lailawk leh thung. 

Mahse, US police-ten mihang George Floyd-an tih hlum avanga vun rawng inthliarna duh lohna lantirna nasa tak karah NFL star-te chuan NFL chu vun rawng inthliarna do turin an nawr. 

NFL commissioner Roger Goodell chuan, "Kan tisual tih kan hria a, player-te chu vun rawng inthliarna duh lohna lantir kawnga an hmalakna kan thlawp a ni," a ti. 

Trump chuan NFL leh US Soccer hi dem nghalin, "Kan ram leh flag zah lohna lian tak a ni," a ti a, US Soccer leh NFL-a inkhel te chu a en tawh loh tur thu a sawi bawk - Trump ngaisangtu tam takin an pu hnung an zui ngei a rinawm. 

Hnam hla sak laia ṭhingṭhit tichhuaktu Kaepernick hian kum 2017 hnuah club a nei leh tawh lo a, NFL neitute chu inthliarna kalpuiah puhin a khing bawk - February 2019 khan an inrem leh tawh thung.