Steven Gerrard bazarna hmun Liverpool

Liverpool chuan an club legend leh Rangers boss thar ni bawk Steven Gerrard hna tih awlsam nan an player naupang zawkte chu Rangers-ah loan-a kal an remti dawn niin khawthlang media te chuan an tarlang.

Rangers hian Liverpool aṭang­in Ovie Ejaria chu season khat chhung atan loan-in an hawh fel der tawh a, kum 20 mi midfielder hi Gerrard a hnuaia in zir turin an duh.

Gerrard hian Harry Wilson, Ben Woodburn leh Dominic Solanke pawh loan hmanga lak a duh nia sawi a awm a, Woodburn leh Solanke bik erawh Jurgen Klopp-a'n a ui ve deuh niin an sawi.

Rangers hian June khan Liverpool-in an chhuah zalen hnuah Jon Flanagan chu season hnih chhung atan contract an lo ziahpui tawh bawk a, Reds youth system chhuak defender hi hmabak nei ang tak ni ṭhin mah se hliam vangin beisei a phak lo.

Kum 25 mi defender chuan, "Stevie-a'n min rawn biak khan ka tan chuan ngaih­tuahna sen buai a ngai lo," tiin Liverpool-a a captain ṭhin hnuaia a khel thei tur chu a hlim hle.

Steven Gerrard enkawlna hnuaiah Rangers hian kar hmasa Zirtawpni khan an pre season friendly match an khel a, League Two club FC Bury chu 6-0 ngawtin an sawp.

Ibrox Stadium-a Gerrard-a'n a team enkawl hmasak ber hmuh duh hian mipui 41,000 ngawtin a hmunah Rangers inkhel hi an en a, Scottish football-in ngaihven a hlawh chho zel dawn niin a lang.