Arsenal-ah Torreira-a'n medical nei

Uruguay midfielder Lucas Torreira leh France Under-20 international Matteo Guendouzi te chuan nimin khan Arsenal-ah medical an nei a, he thuziak i chhiar meuh chuan London club player an ni tawh hial ang.

Torreira hi Uruguay tana World Cup-a an player pawimawh kha a ni a, Russia pan hma khan Serie A lama a khelhna Sampdoria leh Arsenal chu a man tur zat pound maktaduai 26-ah an lo inrem daih tawh.

Kum 19 mi Guendouzi hi French club Lorient aṭanga lakluh tur a ni thung a, player hmabak nei êng tak niin Arsenal boss thar Unai Emery hian hma hun thlir chungin a lalutah a ngaih theih.

Player pahnih hma hian Arsenal chuan Switzerland defender Stephan Lichtsteiner chu Juventus aṭangin a thlawnin an lalut tawh a, German goalkeeper Bernd Leno chu Bayer Leverkusen aṭangin an lalut a, Greece defender Sokratis Papastathopoulos chu Borussia Dortmund aṭangin an lalut bawk.

Arsene Wenger chhuah hnua Unai Emery enkawlna hnuaia insiamṭhat tum mek Arsenal hian player thar panga an nei dawn tihna a ni a, an ropui ṭhinna neihlet leh tumin an bei mek.