Mang ram chentu England player

England-in golden generation an tih hunlaia Steven Gerrard, David Beckham, Paul Scholes, Frank Lampard leh Wayne Rooney te ho kha chu academy ṭha chhuak an ni a, an tleirawl chhuah tirh phat aṭanga player 'beiseiawm' tia khawvelin a thlir te an ni.

Mahse, kum 2018-ah golden generation te tih theih loh titu England team an rawn chhuak a, World Cup Semifinal an lut. Golden generation vanglai nena khaikhinin player inthlau mah se a thiam pali zingah an tel miau a, an zinkawng lah a ngaihnawm em em bawk.

Player ṭhenkhat chu club a 'awm' tih pawh kan hriat mang loh Darlington, Alfreton, Halifax, Welling leh Aldershot tih vela lo khel tawh an ni a, vawiin an thlen chin erawh ropui tiin khawvelin a fak si.

Kieran Trippier

Kum 23 mi a nihin Trippier-a'n Premier League-a a match hmasa ber a khel ve chauh a, England tana a match hmasa ber a khelh pawh nikum mai kha a la ni! Russia-ah erawh England innghahna a ni a, a chhawr bera an sawi chu Kyle Walker-a'n Manchester City a pan kha a ni.

Manchester City academy chhuak ni mah se first team tan a khel phak lo a, Barnsley leh Burnley-ah te a kal kual hnuin 2015 khan Spurs a pan a, season hmasaa Walker a chhuah khan kum hnih chhungin league match 18 bak a khel lo!

Harry Maguire

England defender pawimawh hi Euro 2016-ah kha chuan squad-a tel chu sawi loh amah pawhin a mang phak lo–fan angin an inkhel en turin a zin ṭawk a, England flag nena inthuam chungin inkhel an en!

2016-a a dinhmun sawiin Maguire chuan, "Hull khan Premier League khelh phak tumin playoff chu kan khel ngei a, mahse regular ka ni phak lo. Tun dinhmun hi chu ka ngaihtuah thleng lo," tiin mang rama a chen mek thu a sawi.

Jordan Pickford

Kum 2014 World Cup-ah kha chuan Pickford hi League Two club Burton Albion-ah regular a ni phak lo a, 2011-13 inkar phei kha chu non league lamah a hun a hmang! Premier League-ah season hnih chauh hun a la hmang a, tunah erawh World Cup-a goalkeeper hmuhnawm ber zinga mi a ni ta.

Dele Alli

Alli thiam zia inhrilh nawn kan ngai lo–hei erawh hre lo kan la tam mai thei. Kum 2014 World Cup lai kha chuan League One club Milton Keynes Dons tan a khel!

Harry Kane

Tlarhmaa England innghahna Kane meuh pawh 2014-ah kha chuan a chuti lua lo–Premier League match 10 chiah Tottenham Hotspur tan a la khel phak a, goal thum a khung. Tunah erawh captain armband nen World Cup top scorer a ni mek.