Rorelna Ni ; Mizoram, Manipur leh Tripura bukin an awm dawn

Vawiin hian NorthEast aṭanga Santosh Trophy khel tur a hriat kim dawn a, group B-ah Mizoram, Manipur leh Tripura ten beisei an la neih vek avangin boruak a sang hle. Tlai dar 2:00-ah NorthEast football-a ṭha bera inchhal pahnih Manipur leh Mizoram te an inkhel ang a, chawhma dar 9:30-ah Tripura leh Nagaland te an inkhel bawk dawn.

Inelna neihna hmun hi Manipur khawpui Imphal a ni a, Aizawl FC coach hlui Gift Raikhan leh a hote hian September 10 aṭanga training an ṭan tawh avangin team ṭha tak an ni bawk. Team pathumin final round luh beiseina an la nei a, team pakhat tan chauh hmunruak a awm avangin vawiin 'RORELNA NI' hian ngaihven a hlawh hle.

Tripura tan beiseina
Qualifying round ṭantirh khan Tripura hi rinkai an ni pha lo. Mizoram leh Manipur el pha ber tura ngaih chu Tripura ni loin Nagaland an ni zawk. Tunah erawh Nagaland tan beisei tur a awm tawh lo a, Tripura erawh an chak a nih chuan final round lut turin beiseina sang tak an nei a ni.

Khuman Lampak Main Stadium-ah chawhma dar 9:30 hian Tripura leh Nagaland te hi an inkhel dawn a, Mizoram aiin Manipur-in inkhel hi an ngaihven ang. Tripura hi an chak a nih chuan Manipur tan final round lut turin Mizoram hi goal thum tala an hneh a ngai dawn a, a harsa dawn.

Manipur coach Gift Raikhan chuan, "Tripura leh Nagaland inkhel result-ah kan innghat a, inkhel result-in kan game plan tur pawh a hril ang," tiin Vanglaini a hrilh.

Manipur chu
Santosh Trophy-ah Manipur-in result ṭha neih an harsat a, tun ṭumah hian qualifying round an thlen avangin final round thlen ngei an tum ruh hle. Training pawh an nei hma a, Manipur hi ni 82 chhung an training tawh a, an ṭhat vanglai tak turah a ngaih theih.

Gift Raikhan chuan, "Team ṭha tak kan dinah kan ngai a, kan thawkrim em em bawk. Amaherawhchu Tripura lakah khan kan tawnhriat ngah tawk lohna a lang a, kan famkim lo tih a hriat theih. Kan khelh ṭhat loh ṭum kan tawng te pawh a ni thei bawk," tiin Tripura an hneh loh chungchang a sawi.

Manipur hian an match hmasa berah Mizoramin 1-0 chauha an hneh Nagaland 3-0 a an hneh avangin an ṭha thawkhat tih a hriat theih a, coach tawnhriat ṭha hnuaia hun rei tak training tawh an nih avangin tawh an khirh dawn tih a hriat bawk.

Neroca leh Aizawl FC coach hlui Gift chuan, "All Manipur Football Association aṭangin pressure pakhatmah min pe lo. Hna ka thawk ṭha a, ka naute ka ringtawk. Beisei kan la nei a, final round kan la lut thei tih hre chungin Mizoram kan hmachhawn ang," tiin Mizoram hneh ngei a tum thu a sawi.

Mizoram ve thung
Mizoramin match hnih an khelh tawhah goal an la chhuah lo a, hnehna an chang ve ve bawk. Hemi a nih avang hian tlarhnung an thlak a rinawm loh. Keeper tawnhriat nei ṭha F. Lalmuanawma'n goal a veng ang a, captain Lalrinchhana Tochhawng leh Lalmuanawma te tlarhnungah inkawpin F. Malsawmzuala (U21) leh Lalremruata (U21) te mual sirah an awm nawn ang.

Tripura nena bul ṭantu Lunglei tlangval pahnih Lalnuntluanga Bawitlung leh Lalengzama Vangchhia bakah Hnahthial tlangval K. Lalrinfela ten midfield an luah lum ang. Tlarhma lama maltlat Lalhriatpuia hrem vangin a inlan thei dawn lo a, Serchhip tlangval Lalrinzuala a la dam chian loh avangin MPL-a tawnhriat nei ṭha Salem Veng tlangval David Lalchhuanawma chu bul ṭan tura ngaih a ni.

Match hnuhnung berah HK Lalhruaitluanga leh Lalbiakhlua (U21) te hmangin mual sir aṭangin an nawr a, Manipur lakah hian an thlak danglam thei. Chutihrualin Under 21 player pathum an luh ngei ngei a ngai.

Mizoram coach Samson Ramengmawia chuan, "Kan chak loh chuan final round kan lut dawn lo a, draw-in lut thei mah ila Manipur hneh ngei kan tum dawn. Kan match tawp berah hian chak ngei kan tum a, chumi tur chuan kan naute pawh kan fuih a ni," tiin Vanglaini a hrilh.

Santosh Trophy leh Mizoram
Mizoramin kum 2014 khan a vawi khat nan Santosh Trophy nomawi an chawi a, hemi hma lam hian record chhuan tur an nei lo. Nomawi chawi hnuah Mizoram hi che chhe lo mah se vawi khat mah final an lut tawh lo.

2014
Qualifying round: Nagaland (3-0), Arunachal Pradesh (5-0), Manipur (2-0) te an awm a, an hneh vek.
Final round: Kerala (3-1), Maharashtra (2-0), Services (4-1), Uttarakhand (2-1) te an hneh vek. Semifinal-ah Tamil Nadu chu extra time-ah 3-1 in an hneh a, final-ah Railways 3-0 a hnehin an champion.

2015
Qualifying round: Tripura (2-0) leh Meghalaya (3-0) te an hneh ve ve.
Final round: Delhi (2-0), Kerala (1-0) leh Railways (1-0) te an hneh a, match hnuhnung berah Goa nen 2-2 in an inhnehtawk. Semifinal-ah Punjab nen hun pangngaiah 1-1 in an inhnehtawk a, 12-11 in penalty shootout-ah an chak lo.

2016
Qualifying round: Manipur nen chiah group khatah an awm a, ṭum hnih inkhelin match hmasa zawkah 0-0 in an inhnehtawk. Match hnihnaah Mizoram 2-0 in an chak.
Final round: Railways nen 1-1 in an inhnehtawk a, Maharashtra lakah 1-0 in an tlawm. Mizoram hian Jammu & Kashmir (2-1) leh Services (2-1) te hneh zui mah se pathumna niin an tla ta tho. Final-ah Mizoram hneh hnu Services-in Maharashtra hnehin an champion.

2017
Qualifying round: Tripura (6-0) leh Manipur (2-1) te hnehin an tling.
Final round: Maharashtra (3-1), Kerala (4-1) leh Railways (5-1) te an hneh a, Punjab nen goal awm loa inhnehtawk bawkin semifinal an lut. Mizoram leh West Bengal te hun pangngaiah 0-0 in an inhnehtawk a, penalty shootout-ah champion zui ta West Bengal 6-5 in an chak.

2018
Qualifying round: Arunachal Pradesh (2-0) leh Assam (3-0) te hnehin an tling.
Final round: Goa (3-1), Odisha (5-0) leh Punjab (2-1) te an hneh a, match tawp berah Karnataka 1-0 in hneh lo mah se semifinal an lut. Mizoram hian Kerala 1-0 a hneh loin an tla.

2019
Qualifying round: Mizoram leh Meghalaya ten Tripura 3-0 ve vein an hneh. Lammuala inkhelah Mizoramin mikhual Meghalaya 1-0 in an hneh lo a, final round an thleng zo lo.

2020
Qualifying round: Arunachal Pradesh (1-0), Tripura (2-1) leh Assam (2-1) te an hneh vek a, final round an lut.
Final round : Covid-19 vangin inelna neih theih a ni lo.