MPL la khel dawn lo

Hri leng avangin Mizoram chhunga football inelna sang ber Mizoram Premeir League chu 2021-22 season chhungin kalpui a ni dawn lo.

Nimin khan Mizoram Football Association, Mizoram Premier League club aiawhte League leh MFA thawhpui Zonet aiawhte MFA office-ah an ṭhukhawm a, Covid-19 vanga inelna kalpui rih lo turin thutlukna an siam.

Tun season kal mek 2021 - 22 season hi nakkum May-a tawp tur a ni a, MPL kalpuina turin team inbuatsaihna hun a tlem tawha an ngaih bakah hripui avangin club-in sum leh paiah harsatna an tawk hlawm a, sorkar inkaihhruainaah entu awma inkhel buatsaih a la rem lo bawk nen, season tharah ṭha zawka MPL kalpui theih inbeisei chungin tun season (May 2022-a tawp tur) chu MPL kalpui loh hi an rel ta a ni.

MPL neih hnuhnun ber chu kum 2019 kha a ni a, RG Stadium-ah Aizawl FC-in Electric Veng FC hnehin an champion. He mi hnu hian Covid-19 vangin inelna neih chhunzawm theih a ni lo.

Hetihlai hian footballer naupang zawkte hmasawn zelna tur ngaihtuahin MPL Under 18 leh Mizoram Under 15 League chu kalpui hram dan ngaihtuah ni se, an ti a. Kum 2022-ah hripui a ziaawm chuan kum naupang zawkte tán inkhel buatsaih a ni ang.