Old Trafford-ah Arsenal an lenglut dawn

Zanin dar 1:45 hian Old Trafford-ah Manchester United leh Arsenal te an inkhel dawn a, Premier League inkhel pawimawh a nih dawn avangin ngaihven a hlawh ang.

Gunners hian season bul ṭan ṭha lo mah se an hmelma Man United aiin point ngain an hmu sang tawh. Red Devils hian result an neih ṭhat loh avangin Ole Gunnar Solskjaer an ban a, manager lailawk atan Ralf Rangnick an lalut.

German manager Rangnick hi visa a la fel theih loh avangin Arsenal nen hian team la ho thei dawn lo a, Michael Carrick-a'n team a enkawl ang. Carrick-a hnuaiah Man United-in Villarreal an hneh a, Chelsea nen an inhnehtawk tawh bawk.

Man United-in hrem vanga Chelsea laka khel thei lo Harry Maguire an chhawr thei dawn a, chutihrualin captain Maguire awm loh ṭum hian Eric Bailly leh Victor Lindelof te an khel ṭha hle.

Hetihlai hian Paul Pogba, Edinson Cavani leh Raphael Varane te hliam vangin an khelh thei dawn lo a, Luke Shaw erawh dam hman tura beisei a ni. Tlarhmaah Covid-19 positive Mason Greenwood a dam tawh a, chhawr theihin a awm. Chutihrualin ngaihven zawk tur erawh Cristiano Ronaldo a ni a, Portugal captain hi Chelsea lakah bench-ah ṭhuttir niin sawi zui a hlawh.

Carrick-a hnuaiah Man United-in hmasawnna an nei a, English manager hian thutlukna chungchangah Rangnick a inrawlh loh thu a sawi. Inkhel pahniha 4-2-3-1 leh 4-3-1-2 formation a hmang a, player thlan dan pawh a dan daih avangin Gunners an hmachhawn huna a thutlukna tur hi hriat a châkawm hle.

Arsenal-in Granit Xhaka leh Sead Kolasinac te an la chhawr thei dawn lo a, Bukayo Saka dinhmun hi a la chiang lo. Gunners hian an match hnuhnung berah tun hnaia neitu thar neih vanga thawm lian Newcastle United 2-0 in an hneh a, inkhel an thunun bawk. Chutihrualin London club hi dah san an harsatna chu Liverpool lakah 4-0 ngawtin an tlawm a, an khingpui tur Man United pawh inchhuang thei an ni lo. Jurgen Klopp-a hote lakah hian 5-0 in an mualpho.

A tawi zawng chuan Arsenal leh Man United te hi champion tura dah theih an ni lo a, chutihrualin Champions League beisei pha tur an ni ve ve. Gunners hi nipui bazara pound maktaduai 150 vel seng an ni a, a rah an seng ṭan.

Keeper Aaron Ramsdale-a'n Bernd Leno a nek chhuak a, defender Ben White pawh Gabriel nen an inkawp fuh hle. Japanese right back Takehiro Tomiyasu a rintlak a, Xhaka hmunruak Albert Sambi Lokonga-a'n a hnawh khat ṭha viau bawk.

Arsenal tana lawmawm erawh an rawlthar Emile Smith-Rowe leh Bukayo Saka te an rintlak a, Pierre-Emerick Aubameyang erawhin tun hnaiah goal khung a harsat. Gabon striker Auba hian goal khung a chhunzawm thei a nih chuan Arsenal tan Old Trafford-a chak hi thil theih a ni a, Champions League khel tura an elpui an nih bawk avangin point thum hlu bik a ni ang.