Barca-in Ferran Torres an beisei

Manchester City forward Ferran Torres chu Barcelona chuan January transfer-ah lakluh an tum dawn nia sawi a ni a, zawhna awm erawh sum lama tlachhe mek Barca hian khawia pawisain nge an lakluh ang, tih chu a ni.

Torres hian season hmasa ṭan dawn khan City hi a zawm ve chauh a, a season hmasa berah match 36 khelin goal 13 a khung a, tun season-ah inelna hrang hrangah match sarih khelin goal thum a khung a, assist vawi hnih a nei.

Mahse, October-ah hliam vangin a talbuai zui a, tunah erawh dam lam pan mekin Krismas vuak vet inkhelah chuan Manchester khaw club tan inlan leh thei tawh tura beisei a ni.

City boss Pep Guardiola chuan, "Torres-a hma hun chungchangah engmah hriat ka nei lo a, in hre duh a nih chuan City director of football Txiki Begiristain emaw Torres-a agent emaw Barcelona emaw in biak a ngai ang. Kei chuan sawi theih ka nei lo," a ti a, Barca a zawm dawn leh dawn loh a sawi theih loh thu a sawi.

August 2020-a pound maktaduai 21-a City zawmtu Torres hian Etihad Stadium-ah kum thum leh a chanve cham turin contract a la nei a, Pep hian a hralh phal kher ang em, tih chu zawhna awm a ni.

Pep-a'n Sergio Aguero a chhuah zalen hnuah Harry Kane a lalut thei lo a, a striker neih chhun Gabriel Jesus-a'n mual sira khelh nuam a ti zawka a lan bawk si avangin number 9-a khel thei pangngai a neih chu Torres deuh chiah a ni.

Mahse, Barca hian sum nei lo mah se player hlawh hnem Philippe Coutinho leh Samuel Umtiti an chhuahtir theih chuan Torres lei theih an inbeisei niin an sawi.

Hetihlai hian Spanish journalist lar Gerard Romero chuan Torres hian Barca pan a rem ti tawh niin a tarlang a, a thusawi hi awih tur a nih chuan kum nga atan contract a ziak ang a, City-a a hlawh aia tlem a la bawk ang.