LPS-in sum sen zat puang; Mizo boxer-ten share pe kir
Mizorama television channel lar LPS chuan Fight Night 2 an buatsaiha an sum sen zat an tarlang a, hetihrual hian Mizo boxer-ten Chhimbal app aṭanga an sum hmuh tur an pek kir thu an puang bawk.
November 27 zan khan NT Lalbiakkima chuan IBA intercontinental title a kawl lai chu Thai boxer Gerrtipong Kumsahwat lakah a humhim a, Dawrpui Multipurpose Centre, Aizawlah round hnih chhungin technical knockout hmangin hnehna a chang.
Siaha boxer bakah hian Mizo boxer dang paruk pawh inlanin fight pasarih a awm a, inhnek hi a hmunah sawm bik tan lo chuan a en theih loh avangin LPS leh Chhimbal app hmangin pay-per-view a pekchhuah a ni.
Chhimbal app lam hian harsatna an tawh avangin Mizo boxer-te chuan app kaltlanga share an neih 85% chu la lo turin thutlukna an siam a, Chhimbal kaltlanga inhnek en tum, en thei silote chu Chhimbal hian sum a pe kir leh ang.
Sum hmuh zat
LPS Fight Night 2 organising committee chuan LPS pay-per-view unit 38,000 an hralh thu an sawi a, Chhimbal lamin unit 2,258 an hralh chhuak ve bawk. A vaiin PPV unit 40,000 chuang an hralh tihna a ni.
LPS PPV unit khat hi Rs.60-a hralh niin PPV aṭanga sum lut chu cheng nuai 22.8 a ni a, sponsorship aṭangin cheng nuai 4 a lut bawk a, a vaia organising committee kuta lut chu nuai 26.8 a tling.
Hetihlai hian Chhimbal PPV unit khat chu Rs.100-a hralh a ni a, unit 2000 chuang hralh aṭanga sum hmuh chu Rs 2,25,840 a ni a, heta ṭanga sum hmuh 85% (Rs. 1,90,932) chu boxer-ten insem tura tih a ni.
Mahse, Chhimbal aṭanga en tumten harsatna an tawh avangin Mizo boxer pasarihte chuan Rs. 1,90,932 hi la loa pe kir turin thutlukna an siam a, Chhimbal hian an chan tur 15% (Rs. 34,908) chu inhnek en tuma lei tawh, en leh thei si lote pek kir an tum bawk.
Sum senna
Fight Night organising committee chuan IBA intercontinental fight an thlen aṭangain nuai 26.8 hmu mah se cheng nuai 30.34 an sen ral thu an sawi a, an thuchhuah aṭanga a lan danin Rs. 3,51,816 an hloh.
NT-a leh Kumsahwat ten dollar 2,000 (nuai 1.5) ve ve an dawng a, inhnek dangah a chak zawkin Rs. 30,000 dawngin a tlawm zawkin Rs. 20,000 an dawng a, fighter hlawha sum sen ral hi cheng nuai 6 a tling.
Fight Night hlawhtlin theih nan LPS bakah Marine Pro Boxing Promotions neitu Devraj Das a ṭangkai a, NT-a promoter chuan, "Kei chuan sum engmah ka la lo a, Fight Night hlawhtlin theih nan ka phak tawkah theihtawp ka chhuah a ni," tiin Vanglaini a hrilh.
Organising committee lam chuan boxer hlawh piahlamah sum senna tur tam tak a awm thu an tarlang a, boxer hlawh atana an insen piahlamah sanction fee leh thil danga an sum sente pawh an tarlang tel.
LPS FIGHT NIGHT 2
Sum Hmuhna
LPS PPV (unit khat Rs 60) Rs. 22,80,000 (unit 38,000)
Sponsor Rs. 4,00,000
Total Rs. 26,80,000
Sum Hmanna
IBA & PBC sanction fee
Boxrec Fee, Belt
Supervisor & Official Salary
Travel, Visa & Transport
Total Rs. 9,78,988
Boxers 14 hlawh Rs. 6,00,000
Ground & Ring management
Decoration, light & sound
Refreshment, staff salary
Total Rs. 11,19,310
Hotel Regency lodging
Bunker hiring
Total Rs. 3,33,518
Total Rs 30,31,816