Haaland-a'n Dortmund a chhan

Merkur Spiel-Arena-ah Borussia Dortmund an lenglut a, injury time-a Erling Haaland goal hmangin tla thei dinhmuna ding Fortuna Dusseldorf chu Inrinni zan khan 1-0 in an hneh hram.

 

Dortmund-in hnehna an chan avangin Bayern Munich-in champion turin match khat dang an mamawh. Dusseldorf erawh relegation playoff khel thei an ni a, tla thei dinhmuna ding Werder Bremen nen point 28 ve ve an hmu.

First half-ah Dortmund keeper Roman Burki-a'n hahna tur a nei lo a, Dortmund erawh an vanduai. Jadon Sancho through ball ṭha zet chu Achraf Hakimi-a'n goal-ah a chantir thei lo a, keeper Florian Kastenmeier-a'n a dang ṭha hle.

Second half-ah Haaland-a ball pet per chu Raphael Guerreiro-a'n kawh zetin a volley goal. VAR hmangin an en let a, ball-in Guerreiro kut a per avangin pawmsak a ni lo. 

Dortmund-in an nawr nat avangin tlarhnung a pawp a, Fortuna substitute Steven Skrzybski-a'n goal ban a pet per bakah goal zawnah a pet lo. Hun tawpah goal khung thei bik striker Haaland a rawn lang a, injury time minute ruknaah defender Manuel Akanji-a ball vawrh luh chu ṭha zetin Norwegian striker-in a tauh lut.

Kum 19 mi Haaland chuan, "Replay ka la en lo a, Dortmund hi kan vanduai bikah ka ngai. Handball dan hi kan chhiatpui rih a ni," tiin hnehna chang mah se  Guerreiro goal an pawm loh chu hriatthiam a har thu a sawi.

Red Bull Salzburg aṭanga Dortmund zawmtu Haaland hian Bundesliga match 12 a khelh aṭangin goal 11 a khung a, German club tan season chanve pawh a la khel tling lo chungin inelna hrang hrangah goal 14 a khung tawh a ni.