Liverpool legend Ray Kennedy a thi

English club langsar pahnih Liverpool leh Arsenal tana lo khel tawh midfielder Ray Kennedy chu kum 70 mi niin a thi a, kum 1984 aṭang khan Parkinson's disease (thluak lam natna) a lo nei tawh ṭhin a ni.

Kennedy hian a career ṭantir lamah forward angin bul a ṭan a, a professional career bul ṭanna Arsenal tan match 212 khelin goal 71 a khung a, kum 1971 khan league leh FA Cup-ah Gunners tan nomawi a chawi kawp a ni.

Arsenal chuan, "Kennedy inkhel lai en hman khawpa vannei Arsenal fan-te mitthlaah chuan khingpui tlarhnung a chhaih mangang laite, a goal khung hmanga league leh FA nomawi a ruala kan chawite kha a cham reng tawh dawn a ni," an ti.

England tan vawi 17 inlana goal thum khungtu Kennedy hian kum 1974 khan Arsenal chhuahsanin Liverpool a zawm a, Reds tan league nomawi panga leh European Cup nomawi pathum a chawi a, major title 11 ngawt a hlawh chhuak hman.

Liverpool a zawm aṭanga kum hnih hnuah hetihlaia Reds coach Bob Paisley chuan mual vei lamah midfield angin a chhawr a, a career tawp thlengin he position-ah hian a khel a ni.

Kum 1982-a Liverpool-a chhuahsan hnuah Swansea City leh Hartlepool United tan a khel a, Cypriot club Pezoporikos-ah rei lo tê player-manager angin hun a hmang bawk.

Liverpool-a a coach ṭhin Paisley chuan, "Liverpool player ropui ber pawl leh fak hlawh lo ber," tiin a hnua ama chanchin a ziahnaah Kennedy hi a fak a ni.