Huaisen mah se Newcastle chak zo lo

Player kim loin hun rei tak an khelh ngai mah se Newcastle United an ṭang thei hle a, an chak dawn ni pawhin a lang hman - mahse hun tawp dawna goal an chhuah avangin an mikhual Norwich City nen 1-1 in an inhnehtawk.

Thawhlehni zan Premier League inkhelah Magpies tana Callum Wilson goal khung chu Teemu Pukki-a'n a sut. Premier League table mawngphaha talbuai team pahnih ten point khat ve ve in an insem.

Hnawhchhuah
St James' Park-a inkhelah defender Ciaran Clark chu Norwich striker Pukki laka a foul avangin minute kuana lekah hnawhchhuah a ni a, season kal laia league match bika chak la nei lo Newcastle tan a mangan thlak khawp ang.

Manager thar Eddie Howe-a'n chak ve ngei an tum thu sawi mah se an hmabak a ko takzet a, chutih rualin player tlem zawk ni mah se beisei ai takin an goal an venghim rei thei - goal khung aiin a venhim hna an ngai pawimawh.

Minute 61-naah penalty an hmu hlauh, forward Wilson-a'n goal atan chantirn hma an hruai, minute 90 chhungin target zawna pet dang an nei lo, an hnapui chu mahni goal venhim a ni chhunzawm.

Mahse, ball chang hnem Norwich tan minute 79-ah striker Pukki inlarin siphurh a sut a, hun tawp dawnah Pierre Lees-Melou chuan chakna goal khung teuh viau mah se keeper Martin Dubravka a paltlang thei lo, point khatah an lungawi a ngai.

Tla tur zia?
Premier League-ah hian tun hmain team pathum chuan an match hmasa 14 aṭangin chak ni hmel an hmu miah lo tawh. Tun dinhmunah Newcastle hian club pathum sulhnu ṭha lo hi an rawn nih rual ta chiah, an hmaa mi pathumte hi an tla vek.

Howe-a naute hian point sarih chiah an la nei, inhamtang tur chuan insiamṭhat an mamawh takzet a, insiamṭha turin nakin nghah chi pawh a ni tawh lo; tuna insiamṭhat nghal an mamawh, inkhelh hma lama manager sawi angin 'vawi khat chak phawt' an mamawh.

Player tlem zawk an nih hnuah Howe-a'n Ryan Fraser la chhuakin Federico Fernandez a dah lut a, 4-3-2 formation hmangin a naute a rem. Ball chang tam lo mah se Jonjo Shelvey, Joelinton leh Wilson ten remchang an insiam thei a, an vanneih ni chu ni se an chak daih mai thei.

Canaries pawh an vannei tawk lo tia sawi theih a ni, target zawna vawi ruk an pet zingah pakhat chiah a hlawhtling. Dean Smith-a naute hian point 10 bak an la neih bik loh avangin tla thei dinhmunah an la ding ve tho a, an tan season harsa a ni.

Leeds an vannei
Thawhlehni zan Premier League inkhel dangah Leeds United chuan Crystal Palace 1-0 in an hneh, goal awmchhun hi hun tawp hma chiaha Raphinha-a'n penalty aṭanga a khung niin, mikhual Palace tan sut leh theihna hun a awm tawh lo.

Team pahnih an inkhel tawk a, goal lut loin an inhnehtawk ngei dawn niin a lang. Mahse, minute 91-ah Eagles defender Marc Guehi-a'n handball vangin penalty a chawi, referee Kevin Friend-a'n Video Assistant Referee (VAR) a rawn hnuah penalty a pe tlang.

Leeds tana penalty chhuihtu Raphinha-a'n harsa lo takin a khung a, season kal laia league goal ruk a khungna niin Leeds tana goal khung hnem ber a ni mek; a club hi table-ah 15-na a nih pui nghal bawk.

Palace hian hun ṭha an neih laia goal an khung lo kha an ui thar leh ṭhin ang. Christian Benteke-a'n six-yard box chhung aṭangin goal zawnah a tauh thei lo, striker Benteke bawk hian remchang ṭha a hmuhah goalkeeper Illan Meslier a paltlang thei lo.

Lawm leh lawm lo
Leeds boss Marcelo Bielsa chuan, "Season kal laiah kan vannei tawk lo a, point kan hmuh theihna ngei turah pawh kan hloh leh ṭhin. Tun ṭumah chuan vanneihna chu kan lamah a ṭang ve ta.

"Raphinha-a'n a chunga mawh-phurhna tla a hlen chhuak thei, inrintawkna a neih san zual theih nan goal khung kha a tan a pawimawh, point thum hlu tak min hlawh chhuahsak a ni," tiin a forward a ngai pawimawh hle.

Palace manager Patrick Vieira chuan, "A nihna takah chuan team ṭha zawk kan ni, goal khung theihna remchang tam zawk kan insiam thei lo kha a pawi, thutlukna dik leh ṭha zawk kan siam loh avangin a pawi.

"Chak lo mah ila lungngaia indawm kun hman erawh kan ni lo, match khelh hmabak lehpek atan kan inbuatsaih nghal ang," a ti. Palace hian Inrinni zanah Manchester United an lenchilh dawn; Old Trafford hi Vieira-a'n player a nih laia sulhnu a hnutchhiah tawhna hmun a ni.