Juve chak ve leh ta

Tun hnaia vawi hnih chak lo Juventus chuan chak ni hmel an hmu ve leh ta. Old Lady hian an mikhualna ramah Salernitana chu 2-0 a luhchhuahin point thum hlu tak an hlawh chhuak.

Max Allegri naute hi Chelsea lakah 4-0 a an tlawm hnuah Atalanta an hneh lo, a zawna match hnih tlawm hi Italian club tan chanchin ṭha lo tak a ni. Salernitana lakah erawh Paulo Dybala leh Alvaro Morata ten goal khat ve ve an khung.

Turin club hian goal hnih aia tam khung thei tur an ni. Mahse, Giorgio Chiellini-a goal khung chu VAR hmanga hnawl a ni a, hun tawp dawnah Dybala chuan penalty a hlah bawk - goal hnih chinah an lungawi a ngai.

Juve manager Allegri chuan, "Salernitana hi an khelmualah chuan hmachhawn an awlsam lo, khelmual an hmang thiamin fans an nei ṭha em em bawk. Chuti chung chuan ka naute an khelh ṭhat em avangin point thum kan hmu.

"Tunah chuan Juventus kan ni tih kan hriat thar leh a ṭul a, a bul kan ṭan fuh lo a nih pawhin a sang thei ang bera awm leh turin theihtawp kan chhuah leh tur a ni ang," tiin a sawi a, champion an beisei ngam lo a nih pawhin a sang thei ang thlen an tum.

Juventus hian Serie A match 15 aṭanga point 24 hmuin table-ah pasarihna dinhmun an luah a, hmahruaitu Napoli an phak lohna chu point 11 lai a ni - Naples khaw club hian match khatin an khel tlem zawk bawk a, an inthlauhna hi a la danglam leh thei.

Thawhlehni zan inkhel dangah Atalanta chuan Mario Pasalic-a hattrick hmangin Venezia 4-0 in an sawp a, goal khat dang hi Teun Koopmeiners khung a ni thung. Serie A season hnih chhung chu Atalanta hi goal khung hnem ber an ni a, kuminah pawh an goal nawr a la na hle.

Fiorentina pawhin Sampdoria 3-1 in an hneh, tun hnai khel ṭha thei tak Dusan Vlahovic-a'n goal khat a nei leh a, kum 21 mi Serbian striker hian Italian football inelna sang berah hian goal 39 a khung tawh.

Kum 2000 hnu lama piang zingah Vlahovic hi hmuhnawm leh hmabak nei êng bik a ni a, striker hriam tak Erling Braut Haaland (50 goals) chauh chu European league lian pangaah ani aia goal khung hnem a ni.