IPL club ten player chelh tur an tichiang

Indian Premier League (IPL) 2021-22 season atan team pariatte chuan player an neih sa, an chelh (retain) chhunzawm tur an tichiang. Indian player 19 bakah ram dang player pariatte chu an club-in an chelh.

IPL lama tawnhriat nei leh player langsar ni ṭhin zingah Hardik Pandya, Rashid Khan, KL Rahul leh David Warner te chu chelh an ni lo a, player dangte nen lilam an ni ang.

Club thar pahnih Lucknow leh Ahmedabad te chuan December 25 hmain player pathum - Indian player pahnih leh ram pawn player pakhat an lei thei dawn a ni.

Player chelh chung-changah club nena an inremna a ngai, club lamin chelh an duh loh chu an chhuahtir thei a, club lamin an chelh duh zingah pawh chhuak duh zawk an awm a nih chuan an chhuak thei bawk.

Punjab Kings head coach Anil Kumble chuan Rashid Khan chungchang sawiin, "Lilamna hmuna awm ve a duh," a ti a, a lan dan chuan tun hma lama a sum hlawh aia tam zawka sawmtu a hmuh theih a beisei niin a lang.

Sunrisers Hyderabad chief executive Kaviya Maran pawhin Afghanistan spinner Rashid chu lilam duh zinga mi a nih thu a sawi a, lak let tuma hma an lak tur thu a sawi bawk.

Player an chelh (retain):
Chennai Super Kings: Ravindra Jadeja, MS Dhoni, Moeen Ali, Ruturaj Gaikwad
Delhi Capitals: Rishabh Pant, Axar Patel, Prithvi Shaw, Anrich Nortje
Kolkata Knight Riders: Andre Russell, Varun Chakravarthy, Venkatesh Iyer, Sunil Narine
Mumbai Indians: Rohit Sharma, Jasprit Bumrah, Suryakumar Yadav, Kieron Pollard
Punjab Kings: Mayank Agarwal, Arshdeep Singh
Rajasthan Royals: Sanju Samson, Jos Buttler, Yashasvi Jaiswal
Royal Challengers Bangalore: Virat Kohli, Glenn Maxwell, Mohammed Siraj
Sunrisers Hyderabad: Kane Williamson, Abdul Samad, Umran Malik