Djokovic hoin tennis an khel
Tennis inelna pangngai a awm theih loh laiin Novak Djokovic-a'n inelna a buatsaih a, a hmingah 'Adria Tour' an vuah. Tun kartawp khan a thawhkhatna neih niin, world number 1 Djokovic pawhin match hnih a khel.
Kum 33 mi Djokovic hian amah ang bawka Serbian mi Viktor Troicki chu minute 34 chhung lekin 4-1, 4-1 in a hneh a, a match hnuhnung zawkah erawh world number 32 Filip Krajinovic lakah 4-2, 2-4, 1-4 in a tlawm.
Inelna hi thawh thuma neih tur a ni a, a thawh hnihna chu Montenegro-ah neih tum ni mah se an ṭhulh leh rih, an ramah hian Serbian mi zin luh an phal loh vang a ni. Zadar, Croatia leh Bosnia-Herzegovina-ah an khel leh thung ang.
Tennis tournament hi March thlatir aṭang khan coronavirus vangin an chawl lailawk mek, ruahman dan chuan July thla chawhnu lamah khelh leh theih an beisei. US Open leh French Open chu khelh theih an la beisei mek.
Adria Tour chu?
• Tennis inelna pangngai awm loh chhungin Novak Djokovic hmalakna a neih a ni a, inelna pangngai ang a ni lo.
• Match tin hi best of three set hmanga khelh a ni a, set la turin game li lak a ngai, 3-3 a nih chuan tie break khelh a ni.
• Deuce a nih chuan a ti dik hmasa leh zawk khan point an hmu, advantage a awm lo.
• Round lehpek chu June 20 aṭang hian Zadar, Croatia-ah khelh a ni dawn a, a hmawr bawkna chu Bosnia-Herzegovina-ah an nei thung ang.
• Inelna hi kar tawpah zel neih tur a ni ang a, group pahniha ṭhen hrante chu an inkhel kual ṭhin dawn a ni.
• An inkhelh kual hnua a sang pahnihten final an khel ang.