Lewis Hamilton-a'n Raikkonen a kap
Formula 1 champion lai Lewis Hamilton chuan Pathianni zana tlan zawh tak British Grand Prix-a hnehna a chan loh chhanah Kimi Raikkonen a puh a, Ferrari driver hian intlansiak ṭan tirah a ti buai niin a sawi.
Silverstone-ah kum dang ang bawkin Hamilton kha hnehna chang leh tura beisei niin, Ferrari driver pahnih Vettel leh Raikkonen te hma pole position aṭangin bul a ṭan. Mahse, lap hmasa berah Raikkonen nen an inti palh a, championship lama a elpui ber Vettel-a'n hnehna changin a dinhmun a sawhngheh phah a ni.
World champion vawi li ni tawh Hamilton chuan, "Kimi khan ka tihpalh a ni, tiin min hrilh hnuah intlansiak kan chhunzawm zel. A chang chuan tihsual palh kan nei ṭhin a, chuta ṭang chuan kan inzir ṭhin," tiin a sawi.
Season kal laiah Formula 1 intlansiak hi vawi 10 an nei tawh a, German tlangval Vettel-a'n point 171 hmuin hmahruaitu a ni mek - a hnung chiahah hian point 163 hmutu Hamilton a awm. July 20 hian German Grand Prix an tlan leh ang.