Hmeichhe player-in beisei an phak lo

Wimbledon khelh mekah hmeichhe player langsar ten beisei an phak lo a, seeded sang 10 zinga pakhat mahin quarterfinal an lut phak lo! Seeded pasarihna Karolina Pliskova chu Kiki Bertens lakah 6-3, 7-6 (7-1) a chak loin last 16-ah a zinkawng a tawp.

Thawhṭanni zan All England Club-a inkhelah kum 26 mi Bertens a khel chhe lo a, Venus Williams hnehtu hian a khingpui service hi vawi li chhuhsakin a service vawi hnih a hloh thung, a service neih ṭhat hmang ṭangkaiin aces vawi sarih a siam.

Inkhel dangah Angelique Kerber erawhin Belinda Bencic chu 6-3, 7-6 (7-5) a hnehin quarterfinal a lut thung. Seeded 11-na Kerber hma hian nikum French Open champion tawh Jelena Ostapenko leh Dominika Cibulkova te pawh an tlang tawh bawk.

Vawi sarih champion tawh Serena Williams pawhin Evgeniya Rodina chu 6-2, 6-2 a hnehin a thiam pariat zingah a lo inhlangkai tawh - nizan khan hmeichhe singles quarterfinal match pali hi khelh zui leh a ni a, he thu buatsaih lai hian result kan hre hman lo.