Sharan-a'n quarterfinal a lut
Indian tennis star Divij Sharan chuan a vawi khat nan Grand Slam quarterfinal a in vaw kai. Sharan leh a ṭanpui New Zealand tlangval Artem Sitak te chuan Jonathan Erlich leh Marcin Matkowski te ṭangdun hnehin a thiam pariat zingah an inhlangkai a ni.
Thawhṭan zan mipa doubles last 16 inkhelah India tlangval Sharan leh a ṭhianpa hian bul an ṭan fuh lo hle a, set hmasa pahnih an hloh avangin chak lo chiang tura ngaih an ni hman. Mahse, darkar thum leh minute 55 an khelh hnuah 1-6, 6-7(3), 6-4, 6-4, 6-4 in hnehna an chang let.
Sharan hian major tournament-ah singles khel phak lo mah se tun hnaiah doubles huangah hma a sawn zel a, 2013 khan US Open-ah third round a inhlankai tawh bakah 2017 French Open second round a paltlang a, kumin January thla a khelh Australian Open-ah khan third round a lut phak bawk a ni.
Sharan leh Sitak te hian nizan khan seeded pasarihna Mike Bryan leh Jack Sock te ṭangdun an hmachhawn leh a, he thu buatsaih lai hian result kan hre hman lo.