Pep-a'n Gerrard a hneh; Hammers leh Foxes chak zo lo

Steven Gerrard-a'n Premier League club a enkawl hnua a match hmasa pahnihah hnehna chang ve ve mah se Manchester City a tawn meuh chuan Gerrard pawh a tlawm ve ta a, Pep Guardiola enkawl team lakah 2-1 in an tlawm.

Premier League champion City tan Rúben Dias leh Bernardo Silva ten goal khat ve ve an khung a, Villa tana Ollie Watkins-a goal khat khungin a team a beng harh zo lo.

Hetihlai hian 3-2 a Liverpool an hneh hnuah West Ham an chak hleithei lo a, Wolverhampton Wanderers (1-0) leh City (2-1) laka an tlawm hnuah Brighton & Hove Albion chu 1-1 in an inhnehtawkpui leh ta.

Season hmang ṭha lo Leicester City pawh a zawnin an chak hleithei lo a, khualmualah Southampton nen 1-1 in an inhnehtawk - table-ah pariatna an ni mek.

Hei le City
Villa Park-ah City-in goal khung turin an nghah rei a ngai lo a, minute 27-na lekah Ruben Dias chuan Raheem Sterling-a ball pek chu penalty box pawn aṭangin mawi zetin a pet goal a, midfielder thiam bik ke aṭanga chhuaka mawi a ni.

City-in an la duhtawk mai lo. First half tawp nan minute hnih chiah a awm tawh tihah Bernardo Silva chuan Gabriel Jesus siamsak chu mawi zetin a volley goal a, 'world class' goal tia fak loh chi a ni lo.

Chawlhlawkah Gerrard-a'n a naute thu ṭha a hrilh tih a lang a, second half ṭan aṭanga minute hnihna lekah Watkins chuan corner aṭanga ball kal chu ṭha zetin si phurh sut ṭhen nan a khung.

Villa Park-ah mualneitu hi an tlawm mai lo - kum 18 mi Carney Chukwuemeka chuan Villa tan chance duhawm a nei a, City goalkeeper Ederson kher a nih avangin goal-ah a chantir thei lo.

Champion beisei
Gerrard-a hnuaiah Villa-in harhtharna an chang a, league match nga zet a zawna an tlawm tawh chu Liverpool legend hian thlaksakin a match hmasa pahnihah Brighton & Hove Albion leh Crystal Palace a hnehpui.

Rangers boss hlui hian a player-teah beiseina thar a siamsak a, fan-te pawhin a chungah rinna an nghat. City lakah pawh vannei ngat se point hlawh chhuak thei an ni. December-ah Leicester, Liverpool leh Chelsea an hmachhawn dawn avangin Gerrard tan fiahna a inchhawp chho zel dawn.

Team boruak ṭha leh indinthar mek lakah City-in hnehna an chang a, Pep chuan, "Duhthlan tur kan nei chuang em ni? Kan hmaa chona inchhawp chu kan hmachhawn zel ang," a ti a, champion an tum thu a sawi.

Rin loh taka Crystal Palace (2-0) laka an tlawm hnuah City-in league match li chu a zawnin hnehna an chang leh ta a, Pep-a'n Premier League match 204-ah vawi 150 hnehna a chang ta a, heti zat chak tura match mamawh tlem ber a ni.

Hammers an zuih
Duhawm taka season bul ṭantu West Ham-in chuai lam an pan der a, an chak hleithei lo - a zawna league match thum an chak zawh lohna ni turin Brighton chu 1-1 in an inhnehtawkpui.

Hammers tan Tomas Soucek chuan minute ngana lekah goal hmahruai khung mah se hun tawp nan minute khat chauh a awm tawh tihah Brighton-in si phurh an sut a, Neal Maupay chuan match sarih zet goal a khung loh hnuah a thiam a la theihnghilh lo tih pholangin mawi zetin a khung.

Hammers vanneih zan a ni lo - Pablo Fornals chuan goal bar a pet per a, buai nuai kara Brighton defender Shane Duffy-a'n an lama a tilut emaw tih chu VAR hmanga rei tak ennawn a nih hnuah pawm a ni lo.

Moyes chuan, "VAR leh refereeing thlengin a ṭha a, mahse, goal pawm loh zel nan chuan ṭha ka ti lo. Goal hmuh duhin fans an lo kal a, kan pawm loh zel chuan a buaithlak ang. Khatiang goal-a pawm loh chu a mak a, an pawm loh chhan ka hrethiam lo," a ti.

Foxes a pawi
FA Cup-ah an champion avangin Leicester-in thawm nei na viau mah se beisei angin an khel chhuak hleithei lo a, Saints nen 2-2 in an inhnehtawk leh ta - league match 14 an khelhah vawi nga chiah an la chak!

Southampton khelmualah pawh Brendan Rodgers-a naute hi si phurh suttu zawk zel an ni a, insiamṭhat an mamawh tih a lang. Saints tan Jan Bednarek chuan minute thumna lekah Mohammed Salisu-a shot dan per aṭanga ball kal chu hmahruaina goal ni turin a khung.

Foxes tan defender tawnhriat nei ṭha Jonny Evans chuan khung ve leh mah se Saints-in Che Adams hmangin hma an hruai nawn a, Leicester an hawihai.

Mahse, Foxces-in player an nei ṭha zawk tih a lang zui a, James Maddison chuan minute 49-naah an si phurh a sut leh a, goal dang erawh a lut tawh lo - Maddison hian inelna hrang hranga inkhel bul a ṭan hnuhnung parukah vawi li goal a khung.