Vawiin aṭangin second Test khel ṭan dawn

India leh New Zealand te chuan vawiin chawhma dar 9:30 aṭangin Test match vawi hnih an khelh tura a hnuhnung zawk chu Wankhede Stadium, Mumbai-ah an khel ṭan dawn.

Green Park, Kanpur-a khelh first Test-ah team pahnih an inhnehtawk. India dinhmun ṭha hret mah se New Zealand tan Rachin Ravindra leh Ajaz Patel te an ding tluan a, chak zawk an awm ta lo.

Second Test-ah hian first Test-a inlan lo captain Virat Kohli a rawn let leh tawh dawn a, a awm loh laia captain hna chelhtu Ajinkya Rahane a thlak rin a ni. Bowling department lamah pawh veteran pacer Ishant Sharma aiah Mohammed Siraj a rawn luh a rinawm bawk.

Chutihrualin first Test-ah century (105) leh half century (65) siamtu Shreyas Iyer erawh khawih chet thiang loah a ngai theih a, New Zealand nen second Test an khelh hunah hian fiahin a awm ang.