Point thum hmuh thiam Chelsea
Premier League hma-hruaitu Chelsea chuan Watford 2-1 in an hneh a, khel ṭha vak lo mah se point thum an hlawh chhuah miau avangin table chung berah an awm chhunzawm.
Blues tan hian Mason Mount-a'n goal hmahruai a khung bakah Hakim Ziyech goal khung tur a siamsak bawk a, an goal pahnih inkarah hian Watford lamin forward Emmanuel Dennis hmangin goal khat an khung ve bawk.
An elpui Manchester City leh Liverpool ten hnehna an chang a, chak zo lo ni se la chuan Chelsea kha pathumnaah tla hniam thei an ni. Mahse, mamawh hunah tak Mount a inlar a, chakna goal khungtu Ziyech chu a zar zotu a ni.
Chelsea manager Thomas Tuchel chuan, "Ni danga kan khelh dan phung kan phak lo, a mawhphurtu zingah kei pawh ka tel. A nihna takah chuan inpeih hman lo chunga inkhel ang mai kan niin ka hria.
"Kan khelh ṭhat loh kha a chhan tam tak a awm, chung zingah chuan Watford khelh ṭhat pawh a tel. Siam ṭhat ngai tam tak kan nei, a rang thei anga insiamṭhat a ngai, a chhan chu kar tawpah match a awm leh nghal," a ti.
Blues tan hian Saul Niguez-a'n a vawi hnih nan Premier League-ah inkhel bul a ṭan a, hun chanve khelh hnuah Thiago Silva-a'n a rawn thlak. Tuchel chuan, "Player siksawi a ngai a, duhthlan tur awmah yellow card hmu tawh Saul kan thlak," tiin a sawi.
London club hian hnehna chang mah se hmasawn an ngai tih an inhria. Inrinni zanah season hmang ṭha tak West Ham an lenchilh zui dawn. London Derby a nih chuan a boruak a sang leh dawn, manager Tuchel sawi ang hian insiamṭhat nghal an mamawh.
Claudio Ranieri enkawl Watford erawh chak lo chungin an khelh danah hma an sawn hle. Manchester United 4-1 a hneh thei team hian Chelsea lakah pawh hun ṭha an insiamsak nual - mahse goal khung tur erawhin an vannei tawk lo.
Tom Cleverley-a'n goalkeeper Edouard Mendy chauh a hmachhawn tawhah a khung lo. Blues keeper hi a hunah tak rawn tlan chhuakin an lama goal lut tur a veng thei, hun tawp hma deuh pawhin ṭum hnih ngawt an mikhual tlarhnung hi an rumṭhaih thei.
Watford manager Ranieri chuan, "Tun anga ṭha hian kan khel zel tur a ni ang, kan khelh ṭhat miau chuan point chu kan hmu mai ang," a ti. Hornets hian point 13 an nei tawh a, relegation zone-a awm Burnley aiin point thumin an sang mek.