Mumbai-in Mohun Bagan an sawp

Indian Super League inkhel boruak pawh a sang chho zel a, champion tum pahnih inkhelah Mumbai City chuan 5-1 ngawtin ATK Mohun Bagan an sawp!

Mumbai tan Vikram Singh chuan minute 25 chhungin goal hnih a khung hman a, season hmasaa FC Goa forward Igor Angulo chuan goal khat a khung ve leh bawk - chawlhlawk hman a nih meuh chuan 3-0 in Mumbai-in hma an hruai der.

Second half-ah pawh Kolkata club an insiamṭha chuang lo. Minute 46-naah Mohun Bagan midfielder Deepak Tangri chu hnawhchhuah zui a ni a, Kolkata club dinhmun chhe sa a chhiat belh.

Mumbai tan Mourtada Fall leh Bipin Singh ten minute 10 pawh an khelh leh hmain goal khat ve ve an rawn khung zui leh a, 5-0 a ni der!

Bagan tan David Williams chuan goal khat rawn khung ve mah se mualpho zualpui khuhna chauh a tling tawh a, hun a tawp meuh chuan champion lai lakah 5-1 in an tlawm. Bagan defender Pritam Kotal chuan ISL-a a match 100-na khel mah se a tan zan chhinchhiah tlak a ni lo.

Mumbai tan Lalengmawia (Apuia) chuan inkhel bul a ṭan a, Vaivakawn tlangval hian minute 90 khel tluanin a khel ṭha hle. Hmingthanmawia (Valpuia) chu Mumbai hian an kawl bawk a, ani erawh bench lamah hun a hmang tluan thung.

Coach thar Des Buckingham enkawlna hnuaia khel Mumbai hian an match hmasa berah 3-0 ngawta FC Goa an sawp hnuin Hyderabad chu rin loh takin 3-1 in an ngam lo zui a, club ṭha Bagan-in an lo la hmuak zui.

Mahse, hun harsaah Mumbai an tho chhuak a, Kolkata club ṭha leh hausa chungah zahngaihna an lantir lo - ti hian ISL-a match thum khel tawh zingah tlawm nei loa kaltluang an awm tawh lo!

Zanin ISL-ah inkhel pakhat a awm dawn a, Lallianzuala Chhangte leh Jerry Lalrinzuala te khelhna Chennaiyin chuan East Bengal an mikhual dawn - Kolkata club hian Lalrinliana Hnamte an kawl thung.

Chennaiyin hian league match hnih an khelh tawhah hnehna an la chang ve ve a, an match hnuhnung zawka NorthEast United an hnehna inkhelah Lianzuala'n goal khat a khung.

Lianzuala hian ISL-ah match 80 khelin goal 20 a khung tawh a, assist vawi nga a nei bawk - ISL-a goal khung hnem lamah Indian player zingah chuan Sunil Chhetri (47 goals) leh Jeje Lalpekhlua (24) chiah a phak lo.