AC Milan an chak ve leh ta

Zlatan Ibrahimovic-a'n goal hmahruai a khung bakah Junior Messias chuan goal hnih khung belhin AC Milan an chakpui. Milan hian khualmualah Genoa chu 3-0 in an luhchhuah a, tun hnaia an result ṭha lo chu an titawp ta.

Nilaini zan Serie A inkhelah hmahruaitu Napoli erawh an chak zo lo. Naples khaw club hi Sassuolo nen 1-1 in an inhnehtawk a, pahnihna Milan nen an inkarah point khat chiah a awm - match khat khelh fuh loh chuan hmahruaitu hi inthlak thei reng an ni.

Lawm a kim lo
Kum 40 tling tawh mah se Ibra-a'n goal khung a la bansan chuang lo a, tun season kal laiah goal ruk a khung leh der tawh. Loan hmanga an hawh Messias pawhin league match vawi li aṭangin goal thum a khung ta.

Milan hian goal thum an khung a, anmahni lamah goal a lut miah lo. An result leh khelh dan hi lawmna tur a ni, mahse an captain Simon Kjaer chu hliam vanga thlak a ngai a, an lawm a kim thei lo - defender pawimawh hi a chawlh chen tur pawh a la chiang lo.

AC Milan coach Stefano Pioli chuan, "Team enkawl tura contract ka ziah khan Zlatan hi message min rawn thawn hmasa bertu a ni. Ani ho hian eng chena thui nge kan kal theih tih chu kan en zel dawn a ni, a dam ṭha a nih phawt chuan a rintlak.

"Messias hi a insiamrem rang hle a, kan tana a khelh zel theih nan club thuneitu lam nen pawh kan sawiho tawh. Tuna rilru kaptu lian tak erawh Kjaer chungchang a ni, a khup hliam kha a nat lutuk loh hram kan beisei," a ti.

Milan hian Inrinni zanah Serie A table mawngphah luahtu Salernitana an mikhual dawn. An chunga awm Napoli leh team ṭha Atalanta te an intawn dawn bawk avangin Milan tan hmahruai theihna kawng a inhawng mai thei.

Napoli an chelh
Serie A season kal laiah Napoli hi a bul ṭan fuh ber an ni a, a chung ber luahtu pawh an ni. Mahse, Sassuolo lakah erawh goal hnih an neihsa an humhim thei lo, hun tawp dawna goal an chhuah avangin point hnih an hloh tia sawi theih a ni.

Naples khaw club hian second half tir lamah Fabian Ruiz leh Dries Mertens te hmangin hma an hruai a, harsa vak loa chak tura ngaih an ni. Mahse, mikhual lamin Gianluca Scamacca hmanga goal an neih bakah, hun tawp hma chiahin Gian Marco Ferrari-a'n a sut zo.

Inkhel dangah champion lai Inter Milan erawhin hnehna an chang thung. Inter hian Roberto Gagliardini leh Lautaro Martinez te goal hmangin Spezia chu 2-0 in an hneh a, hmahruaitu Napoli an phak lohna chu point hnih chauh a ni ta.

Inter hian season bul ṭan fuh tawk lo mah se an insiamṭha tawh. Italian football inelna sang berah hian - Napoli, AC Milan, Inter Milan leh Atalanta te hi champion thei vek an ni a, an point pawh a la inthlau lo hlawm hle.