PSG-in point an hloh

Lionel Messi-a'n inkhelh ṭan hmain Ballon d'Or a rawn chawi chhuak a, keeper Gianluigi Donnarumma pawh Yashin Trophy nen a rawn ding chhuak bawk - hamrik a rik hma aṭang pawhin Paris khawpui boruak a nuam hem hem hle.

Nilaini zan Parc des Princes-a Ligue 1 inkhelah Paris St-Germain phur viau mah se goal an khung thei lo, an mikhual Nice nen goal awm loin an inhnehtawk a, tun season league match bikah anmahni muala point an hlohna hmasa ber an tawng.

Hliam vangin Neymar inlan thei lo mah se Messi leh Kylian Mbappe te an la awm tho a, ball chang tamin inkhel pawh an thunun hle; goal khung tumin vawi 22 zet pet mah se an vanneih zan a ni lo.

PSG manager Mauricio Pochettino chuan, "Inkhel kan thunun tluan chhuak zak a, mahse kan vanduai a ni. Minute 90 chhunga ka naute khelh danah ka lawm, league hautak tak kan khelh avangin ni tin hmasawn erawh kan ngai," tiin a sawi.

Chak zo lo mah se Paris club hian Ligue 1 table-ah fal takin hma an la hruai mek, match 16 aṭangin point 41 an nei tawh - pahnihna Marseille chuan point 29 chauh an la nei thung.