Konta-i'n tennis chawlhsan

British nula tennis khel thiam Johanna Konta chuan professional tennis a chawlhsan thu a puang, kum 30 mi chauh la ni mah se a khup hliam vanga buaina a neih chu a reh mai thei lo a, a duh aia hmain a chawlh a ngaih phah ta a ni.

Konta hi a vanglai chuan world number 3 pawh a ni phak hial, 2017 khan Wimbledon semifinal a lut - British nula zingah kum 39 chhunga grass court inelna liana semifinal lut thei hmasa a ni hial.

A lakah beiseina sang vaiu mah se hliamin a ti buai zui a, dam taka a inkhelh pawhin beisei a phak thei tawh chuang lo. A inkhelh tam loh bakah result a neih ṭhat loh avangin a ranking pawh a hniam zel, chawlh a puan lai hian number 113-na a ni.

Konta chuan, "Tennis ka khelh hun chhung chu a lo liam ve ta, infiamna nuam leh hlimawm ka hmachhawn chhung khan ka nunah mi tam tam an lo lang a, khangte khan hun hlimawm min tawnpui nasa hle.

"Ka naupan lai aṭanga ka duh leh chak em em thil tam tak ka tihlawhtling thei a, a vaiin hlawhtling vek lo mah se ka hun hman danah ka lungawi, ka tan chuan inelna liana result ṭha neihte kha theihnghilh theih tawh loh tur a ni," a ti.

June thla khan Nottingham Open-ah Konta hi a champion a, tualchhung player zingah Sue Barker (1981) hnuah mahni tualchhunga champion leh thei hmasa ber a ni a, atan nomawi hnuhnung ber a ni nghal bawk.