Real chakna Benzema

Karim Benzema goal khat hmangin Real Madrid chuan an mikhual Athletic Bilbao 1-0 in an hneh a, point 36 neiin La Liga table-ah anmahni hnaih bertu Atletico Madrid aiin point sarih zetin an sang fal.

France international hian chawlhlawk hma deuhin Luka Modric-a shot sual kal zel chu hnai tak aṭangin a khung a, season kal laia inelna hrang hrangah goal 17 a khung tling der tawh.

Mikhual Bilbao lamin theihtawp chhuahin nawr let mah se goal an sual chhuak zo lo a, tun hnai an match hnuhnung parukah chak ni hmel an hmuh tak loh avangin table-ah pawh an kang sang thei lo, pariatnaah an awm.

Carlo Ancelotti enkawl Real erawhin Atletico Madrid lak aṭangin La Liga nomawi chhuhsak ngei an tum ruh hle a, mahse Atletico hian match khata an khelh tlem zawk avangin an inkar erawh a la zim leh thei dawn.

Real hian Pathianni zanah Real Sociedad an lenchilh zui leh dawn. Sociedad hi pathumna ni lai an ni a, manager ṭha Ancelotti naute tan pawh khualmuala point thum va hmuh hi a awlsam lo ang.