Offside en nan tunlai thiamna an hmang dawn

FIFA chuan offside chung-changa thutlukna dik zawk a awm theih nan match official-te pui turin technology thar a duang chhuak a, November 30 aṭanga khelh ṭan FIFA Arab Cup-ah enchhin a ni.

Offside en dikna hmanrua hi Goalline Technology te anga thutlukna rawn siam sa ang a ni ve dawn lo a, official-te puitu tur a ni dawn. Camera 10 aṭanga 12 hman a ni ang a, heng camera-te hian player tinte chu second khat chungin vawi 50 a la hman ang a, 29 data points a chhinchhiah hman ang.

Hmanraw thar hian offside a awm nia a hriat chuan video assistant referee (VAR) a hriattir ang a, anni hian thutlukna tawp an siam dawn. Offside en dikna hmanrua hi 2022 FIFA World Cup-a hman theih beisei a ni. Kum 2020 khan England, Spain leh Germany-ah te hman chhin tum a ni tawh a, Covid-19 vangin en chhin theih a ni ta lo.

FIFA hnuaia football technology and innovation director Johannes Holzmuller chuan, "Limb-tracking technology hman a ni. Point pahnih dah pawimawh a ni. Pakhat chu ball pet ṭanna a ni a, pakhat dang leh chu goalline aṭanga taksa hnai ber. Hetah hian defender emaw attacker emaw pawh a ni thei ang. Technology hmang hian thutlukna rang zawkin a siam theih beisei a ni," tiin a sawi a, referee-te kutah thutlukna tawp a awm tur thu a sawi lang bawk.