MBBA Season Opening 2021 ; Zarkawt BCA-in Khatla TBL an hneh

MBBA Season Opening 2021 final chu December 1, Nilaini zan khan Armed Veng Community Centre-ah khelh a ni a, Zarkawt BCA-in Khatla TBL 79-70 a hnehin an champion.

Zarkawt BCA hian 6th SABA Championship-a India champion puitu Lalrina Renthlei an chhawr thei a, Tuikhuahtlang tlangval hian hmun pawimawh a chang.

Khatla TBL-in bul ṭan ṭha zawkin first quarter-ah 18-15 in hma hruai thei mah se second quarter-a an chetsual avangin halftime-ah 35-30 in Zarkawt BCA-in hma an hruai ta zawk. Team pahnih inhnehtawk chhunzawm mah se BCA 79-70 in an chak.

India international Lalrina Renthleiin 18 points a nei a, BCA tana point nghah ber a ni. Khatla TBL tan Ṭhazuala'n 21 points nei mah se result a thlak danglam pha lo.

Mipa inelnaah hian team 71 an inlan a; MSL team paruk, Division I team pakua, Division II team 13 leh Division III team 43 te an tel a ni.