Liverpool-in an duh zat goal an khung!
Merseyside roreltu chu Liverpool an ni a, Reds captain Jordan Henderson-a sawi angin Merseyside chu a sen a ni - Liverpool chuan an hmelma Everton tan an la sang hret tih an pholang a, khualmualah 4-1 in an sawp.
Ballon d'Or sem zawh taka pasarihna Mohamed Salah-a'n award-in a ṭhatna a hrilhfiah zo lo tih pholangin goal hnih a khung a, tun season Premier League-ah goal 13 a khung tling ta.
Reds tan Jordan Henderson leh Diogo Jota ten goal khat ve ve an khung bawk a, Everton tana Demarai Gray goal khung chu a tirah beiseina siamtu ni mah se inkhel a tawp meuh chuan scoreline chei mawina chauh a ni.
Liverpool-in inelna hrang hrangah match 18 chhung chu a zawnin goal hnih aia tlem lo an khung ta ziah a, Premier League champion an beiseina pawh a nung ṭha chho hle.
An inthlau
Goodison Park-a inkhel an ni a, Reds fans tam takin an la ngainat, an coach hlui Rafael Benitez-a'n Everton boss ni chunga a vawi khat nan Merseyside derby a hmachhawn a, tun hnaia an result avangin ban mai theih dinhmunah a ding bawk.
Mahse, heti chung hian mikhual chu team tlangnel zawk an ni a, inkhel ṭantir aṭangin Everton an nawr a, mualneituin goal venhim bak tih tur dang an ngaihtuah thleng phak meuh lo!
Minute kuanaah Reds-in goal an khung ta nge nge a, Andy Robertson siamsak chu captain Jordan Henderson chuan ṭha zetin goal-ah a chantir.
Hendo a insum lo - minute 10 hnuah Salah tan ball ṭha bik a siamsak a, Egyptian forward hian mawi zetin goal kil sirah a thlawh lut a, player ṭha bik a nihzia min hmuh nawntir.
Beiseina thamral
Minute 38-na a ni a, Everton-in beiseina thar an insiam. Richarlison-a ball pek um luttu Gray chuan Alisson-a man phak lohin si phurh a rawn sut ṭhen a, Goodison Park thawm a ṭha hle.
Mahse, team pahnih an inthlau hret - minute 64-naah Salah bawk kan hmu nawn a, kum 29 mi forward hian tun season-ah match 19 khelin goal 19 a khung ta der a, assist vawi sarih a nei bawk.
Liverpool-in an duhtawk mai lo. Roberto Firmino inhliam hlana a hun ṭha neih Jota-a'n chhawr zel a duh a, Portuguese forward hian minute 79-naah Reds goal lina a khung ve leh.
Everton fan-ten club thuneitute duh khawp lohna, a bik takin chairman Bill Kenwright leh director of football Marcel Brands ban duhna thu aupui chungin inkhel an en, an thinrimna belhchhaha awm chungin an ṭin.
Zanin chu a nuam takzet. Ka naute khelh danah ka lawm a, Goodison kan len tawhah chuan kan khelh ṭhat ber a la ni hial ang. Hmasawn zel tura kan beihna kawngah hmasawnna hmuh tur a awm zel a, ka lawm hle a ni. First half kan khel ṭha a, kan khingpui tan chuan tum harsa tak kan ni. Mahse, holam takin goal kan chhuah a, fan-te pawh an lawm lo. Chutihrual chuan kan insiamṭha zui a, second half-ah inkhel kan thunun lehnghal. Ka player-te zawng zawng khan 10-ah pakua chu an hmu vek a, kan chesual zeuh tih lohah chuan an khel ṭha em em a, mahse, hei hi a tur ve renga kan ngaih erawh a rem lo. - Jurgen Klopp, Liverpool manager
Kan tho leh ang tih ka rin a ngai a, hemi hnuah chuan kan ti ṭha tawh ang tih ka ring ngam - mahse, he beiseina nei reng tur chuan hnehna kan chan a ṭul tawh. Season kan ṭan dan kha en ula, hliam vanga player an chawlh hnem hma kha en ula, league match zahve khelh zawh lamah chuan khatianga ṭha khan min hmuh ka beisei. - Rafael Benitez, Everton boss