Rangnick bul ṭanna tur Crystal Palace
Manchester United chuan Pathianni zan dar 7:30 hian Crystal Palace an mikhual dawn a, manager thar Ralf Rangnick hnuaia an match hmasa ber a ni ang.
Palace hi Patrick Vieira hnuaiah bul ṭan chhe lo mah se tun hnaiah erawh an che ṭha lo. Eagles hian an match hnuhnung pahnihah Aston Villa leh Leeds United te an hneh lo a, Old Trafford-ah point hmuh ngei an tum ang.
Hei le, Ralf
Nimin tlai khan Ralf Rangnick-a'n Man United manager a nih hnua a vawi khat nan press conference a hmachhawn a, thla ruk hnuah pawh manager hna a la chelh theih thu a sawi.
German manager Rangnick chuan, "Beisei anga engkim a kaltluang vek a nih chuan, RB Leipzig-a ṭum hnih ka lo tih tawh angin kum khat dang enkawl turin ngenna kan siam ang. Amaherawhchu engmah thuchiang a awm lo," tiin hun rei zawk Man United enkawl a hnial loh thu a sawi.
Man United hian Rangnick hi season tawp thleng team enkawl turin an la a, season hnih dang club thurawn petu hna a chelh leh dawn.
Ronaldo hi....
RB Leipzig leh Hoffenheim hlawhtling taka team enkawl tawhtu Rangnick hi 'godfather of gegenpressing' ti hialin an sawi. Football khelh dan hmang chi khat gegenpressing hi Jurgen Klopp-a'n a larpui a, Rangnick hi a bul ṭantuah an ngai.
Gegenpressing-ah chuan player an tlan tam a ṭul a, hemi a nih avang hian kum 36 mi Cristiano Ronaldo tan hmun a awm lo tura ngaitu an tam hle. Amaherawhchu Rangnick-a'n Man United-in Arsenal an hneh lai a hmunah a en a, Ronaldo khelh danah a lungawi.
Man United manager thar Rangnick chuan, "Player neih ang zelin football khelh hmang pawh duan a ṭul. Second half-a kum 36 mi Ronaldo khel ka hmuh khan a professional zia hmu. A kum ang zata amah anga fitness ṭha ka hmu lo. Amaherawhchu Ronaldo chauh ni loin team zawng zawng kan din thar a ṭul," tiin a sawi.
Rangnick-a'n a khelh dana Man United khelhtir turin hun ngah lo mah se Crystal Palace nena an inkhelh hunah beisei a sang dawn. Khawtlang media ten uar taka Rangnick an fak avangin Man United ṭantute pawhin beiseina sang zawk an nei ang.