Man United-in Arsenal an hneh

Manchester United-in Ningani zan khan Old Trafford-ah Arsenal 3-2 in an hneh a, Michael Carrick hnuaia match thum an khelhah team ṭha vek an hmachhawn chungin hneh loh an nei lo.

Gunners-in Emile Smith Rowe hmangin goal an khung hmasa a, Bruno Fernandes leh Cristiano Ronaldo te goal hmangin Man United-in an lehthal. Mikhual team-in Martin Odegaard hmangin siphurh sut mah se Portuguese forward Ronaldo-a'n penalty aṭangin chakna goal a khung.

A goal?
Inkhelh ṭan aṭanga minute 13-na lekah Arsenal-in corner kick an hmu a, keeper David de Gea a tlu. Referee Martin Atkinson-a'n a hmuh loh avangin inkhelh kaltlangpui a ni a, Emile Smith Rowe-a'n keeper awm lohnaah a pet goal.

VAR hmangin thil thlen dan ennawn a ni a, De Gea tluk chhan hi a khelhpui Fred-a'n a rah vang a nih miau avangin referee Atkinson-a'n goal-ah a pawm.

Gunners manager Mikael Arteta chuan, "Khatiang kha ka la hmu ngai lo. Referee thutlukna a ni a, VAR hmanga ennawn a nih hnuah goal-ah pawm a ni," tiin a sawi a, thil thlen dan a sawifiah chiang hle.

United ṭha zawk
Man United manager lailawk Carrick-a'n Chelsea an hmachhawn ṭuma bench-a a dah Ronaldo chu a hnampui Bruno Fernandes nen bul an ṭan kawp a, 4-3-3 formation hmang tawh loin 4-2-3-1 formation a hmang ta zawk.

Goal khat chhuah vangin mualneitu an talbuai a, game nung tak an khelh bakah pressure an pe ṭha. An phu angin minute 44-naah Fernandes-a'n Fred siamsak chu siphurh sut nan a hmang.

Second half-ah Ronaldo-a'n minute 52-naah hmahruaina goal a khung a, Marcus Rashford a siamsak a ni. Amaherawhchu Arsenal-in minute hnih pawh tling loah Odegaard hmangin siphurh an sut.

Inkhel nung ṭha takah Man United an vannei ta zawk a, Fred-a'n Odegaard lakah penalty a hlawh chhuak. Referee Atkinson-a'n penalty pe nghal lo mah se mual sira monitor a en hnuah penalty a pe a, Ronaldo-a'n chakna goal khung nan a hmang.