Carrick-a'n Man United a chhuahsan

Michael Carrick chuan Old Trafford-a Arsenal an hneh zawhah Manchester United a chhuahsan tur thu a tichiang. Ole Gunnar Solskjaer an ban hnuin Carrick hian team enkawl hna a chelh a, match thum enkawlin chak loh a nei lo.

Man United hian Carrick-a kaihhruaina hnuaiah Villarreal 2-0 in an hneh a, Champions League knockout stage an lut. Premier League-ah hmahruaitu Chelsea chu an mualah 1-1 in an chelh a, Old Trafford-ah an hmelma Arsenal 3-2 in an hneh leh bawk.

Kum 40 mi Carrick chuan, "Ngun takin ka ngaihtuah a, ka hmalam huna thil thleng thei te ka buk kual hnuah club chhuahsan turin thutlukna kan siam," tiin a sawi a, a thutlukna chungchang player-te hrilh a hrehawm a tih thu a sawi tel bawk.

Carrick hian kum 2006 khan Tottenham aṭangin pound maktaduai 18.6-in Man United a zawm a, English club hi Premier League-ah vawi nga, League Cup vawi hnih bakah Champions League, Europa League, FIFA Club World Cup leh FA Cup nomawi vawi khat ṭheuh a chawipui.

November 2017 khan Carrick hi a lungphu dik loh avangin enkawl a ni a, hlawhtling ni mah se season tawpah football khelh a chawlhsan a, first team coaching staff-ah a tel nghal.

Man United a chetṭhatpui chunga a chhuah chhan sawiin Carrick chuan, "Keima thutlukna siam liau liau a ni. Club leh manager thar ka zah a, club leh Ralf tana ṭha berah ka ngai. Ole tana ka rinawmna chhan pakhat a ni thei a, chutihrualin chhan ṭhahnem tak a awm a ni," tiin a sawi, lungawi lohna a neih loh thu a sawi lang bawk.

United midfielder Bruno Fernandes chuan Carrick chu manager ṭha tak ni tura theihna a neih thu a sawi a, United football director John Murtough chuan, "Player leh coach anga a hnathawh hi a ṭha chungchuang. Manchester United history-a midfielder ṭha ber zinga mi a ni," tiin a fak.