West Ham khelmualah hmahruaitu Chelsea

Tun season Premier League-a team nghet bera chhal ngam chu Chelsea an ni a, Thomas Tuchel-a hnuaia chesual hleithei lo club hian zanin dar 6:00-ah league match khel turin West Ham an lenchilh dawn.

Blues hian match 14 khelh tawh aṭangin table chung ber an luah mek a, an hnuai chiahah hian point khat leka inthlauin Manchester City an awm - Liverpool-in point hnih lekin an thlau bawk a, chetsual a thiang lo.

West Ham tan chetsual a thiang bik lo. David Moyes naute hian champion thlengin sawi ri hman mah se tun hnaiah an chesual a, league match thum a zawnin an chak tawh lo a, palina dinhmun pawh a derthawng mek.

Chelsea an dam lo
Tun hnaiah hliam leh dam lohnain Chelsea a tlakbuak a, heti chung hian an result erawh a chhe hran lo. Chutihrual erawh chuan an khelh danah Blues-in intuaithar an mamawh tih erawh hmuh turin a awm.

Premier League-a an match hnuhnung pali aṭangin vawi hnih chiah an chak a, vawi hnih hi draw result an nei. Manchester United nen 1-1 a an inhnehtawk ṭumin point hlawh chhuak turin penalty an mamawh.

Watford lakah an insiamṭha zui tura ngaih a ni a, mahse, point thum an hlawh chhuak chungin an coach hlui Claudio Ranieri enkawl team lakah vanneihna an mamawh tel tih a lang - 2-1 in an chak hram a, an goal hnihna hi Hakim Ziyech-a'n minute 72-naa a khung a ni.

Hello Lukaku
Blues hian zaninah hliam vangin Mateo Kovacic leh Ben Chilwell an chhawr thei dawn lo chiang a, Trevor Chalobah, Reece James leh N'Golo Kante te dinhmun pawh sawi chian theih a la ni lo.

Hetihrual hian Watford lakah bench aṭangin Romelu Lukaku a lut tawh a, Belgian striker hian zaninah bul a ṭan a nih ngat chuan West Ham tlarhnung tan hnathawh tur a tam ang.

West Ham hian an league match hnuhnung pangaah goal an chhuah vek a, tun season league-ah goal 17 an chhuah tawh - Premier League top four club zinga goal chhuah hnem ber an ni a, Liverpool (43 goals) tih loha league-a goal khung hnem ber Chelsea (33) in goal khung an tum dawn.

Hammers an dai!
Awihawm loh khawpa ṭhain West Ham-in season bul an ṭan a, mahse, tun hnaiah he club hi an chesual - Liverpool meuh 3-2 a an hneh khan beiseina a sang hman a, mahse, Wolverhampton Wanderers (1-0) leh Manchester City (2-1) lakah an tlawm zui.

Kar laihawl inkhelah pawh Hammers an insiamṭha lo. Brighton & Hove Albion (1-1) nen an inhnehtawk leh a, season thara Champions League khelh hi beisei an tum tak tak a nih chuan zaninah tlawm a thiang tawh lo.

Table-a an hnuai chiaha awm Arsenal nen khelh zat inangah point khat lekin an him a, match khata khel tlem Tottenham Hotspur aiin point hnih chiahin an sang - top four-a an dinhmun a nghing.

An ṭha?
West Ham-in insiamṭhat an mamawh laia an mikhual tur hi Chelsea 'ber kher' an ni tlat a, David Moyes-a naute hi an zuih ral mai dawna ngaitu an awm a nih pawhin a awm lo hran lo.

Chutihrual chuan Hammers squad uluk taka en tan Moyes-a team hian Blues barakhaih turin theihna an nei tih an hria ang - tlarhmaah Michail Antonio hian league match 13 aṭangin goal ruk leh assist pathum a nei tawh.

Said Benrahma (3 goals & 3 assists) leh Pablo Fornals (4 goals & 3 assists) te pawh lam hmaih a thiang lo a, midfield-ah Declan Rice leh Tomas Soucek te ho an awm bawk tih hriat tel a ṭha.