Formula 1 vawrtawp an thleng dawn
Car intlansiakna sang ber Formula 1 chu Pathianni zan dar 11:00 hian an tlan dawn a, thil thlen dan a zirin driver champion thar pawh kan hmu thut mai thei - Lewis Hamilton leh Max Verstappen te inbeihna a ni leh ang.
Red Bull driver Verstappen-a'n hnehna chang se, a elpui Hamilton che sualin point a hmuh belh mumal lo a nih chuan Dutch tlangval hi a champion daih thei dawn - Saudi Arabian Grand Prix bakah Abu Dhabi GP bak tlan tur an nei tawh lo.
Beisei a la awm
Formula 1 season kal laiah intlansiak vawi 19 a awm tawh, hmahruaitu Verstappen-a'n vawi kua hnehna a chang tawh. Champion lai leh pahnihna dinhmun luah mektu Hamilton chu ṭum sarih a chak ve tawh thung; an inthlauhna hi point riat a ni.
Mercedes driver Hamilton chuan, "A nihna tak sawi chuan hun rei tak chhunga F1 nomawi inchuh boruak san ber ṭum a ni hial ang. Chona ka hmachhawn lai hi a hautakin a khirhkhan hle a, thil thleng zawng zawng chhut chuan kum hautak ber a ni hial mai thei.
"Champion leh ngei tumin theihtawp ka chhuah a, ka hmaa awm Verstappen lehthal chunga nomawi ka chawi thei a nih chuan a lawmawm dan a sang bik ang," a ti a, inelna neih hmabak pahnih la awmah hnehna chan ve ve a tum.
Britain tlangval Hamilton hian F1 title vawi sarih a la tawh, record nei ṭha ber Michael Schumacher (7 titles) nen an intluk mek. Kuminah hian a champion leh thei a nih chuan tuma tluk phak loha sulhnu nei ṭha ber a ni ang.
Kalphung ngai
A vawi khat nana champion thei dinhmunah Verstappen a ding mek a, a elpui driver leh team dang ten chhunglam leh pawn lam aṭangin chhaih buai tum viau ṭhin mah se a buai duh lo, inelna neih hmabakah pawh a kalphung pangngaia chet a tum.
Dutch tlangval Verstappen chuan, "Season tluana ka chet tawh ang khan ka che leh ang, thil tih danglam tumna a awm lo. Saudi Arabian Grand Prix hi a vawi khatna a ni dawn a, tlankawng thar a nih dawn avangin tu man thil kan sawi lawk thei lo.
"Kar leh maiah inelna kan hmachhawn zui leh dawn a, chuvangin tun hi intlansiak pawimawh a nih bakah a hnuhnung ber atana inbuatsaihna a ni nghal bawk," tiin a sawi a, chesual loa tlan zawh theih ngei a beisei thu a sawi bawk.
Verstappen leh Hamilton ten inbakkaih an nei zauh zauh tawh a, kuminah ngei pawh an pahniha an intai vanga tlan tluan theih loh an nei tawh. Saudi Arabia leh Abu Dhabi-ah pawh boruak an nei leh a nih pawhin a mak lo ang.
Saudi an danglam
F1 intlansiak an neihna hmun dangah hian mihang hmuhsit duh lohna an lantir ṭhin a, heng bakah hian neih inang inkawpte an thlawpna pawh an lantir ṭhin bawk. Saudi Arabia erawhin hetiang thil lam hi an ngaina ve lem lo!
Saudi Arabia ramah chuan neih inang inkawp phal a ni lo a, hetiang ti an awm a nih chuan dan angin vuak hrep bakah tan ina khung theih an ni bawk. Tun hma phei chuan hmeichhe tan lirthei khalh phal a ni lo, hei erawh 2018 aṭang khan tih danglam a lo ni tawh thung.
F1 champion lai Hamilton chuan, "A dik emaw dik lo emaw, intluk tlan kan duh," tiin a sawi a, an kalphung chuan a rilru a luah thu a sawi. World champion vawi li ni tawh Sebastian Vettel pawhin an ram kalphung hi danglam a tih thu a sawi ve bawk.
Driver langsar leh team ṭhenkhatin Saudi Arabia sorkar kalphung hi sawisel chiah lo mah se, an ṭawngkam aṭangin an thlawp lo tih a lang. Mahse, Saudi lam chu an dinna ngaiah an ding tlat a, kalphung thlak tumna an nei lem lo.