Mo-a'n nomawi a ngai pawimawh

Liverpool forward Mohamed Salah chuan mimal chawimawina aiin team anga hlawhtlin chuan a rilru a luah zawk thu a sawi a, "Ka tum hmasak ber chu club tana nomawi chawi a ni," a ti.

Salah hian tun season-ah match 19 khelin goal 19 a khung tawh a, assist vawi sarih a nei bawk - Ballon d'Or sem zawh taka pasarihna dinhmun chauh a hauhte chu vuipuitu a ngah hle.

Kum 29 mi forward chuan, "Goal tam tak khung chu ka duh ngei a, mahse, nomawi chawi hi ka duh hmasak ber chu a ni. Champions League emaw Premier League emawah champion ka duh a, a pahniha champion theih chu duhthusam a ni - chu chu kan vaia kan tum hmasak a ni," tiin a sawi.

Liverpool hian tun season league match 14 an khelh tawh aṭangin goal 43 an khung a, match khata goal thum aia tam khung ziah ang an ni!

Salah chuan, "Kum nga emaw kum ruk emaw bawr vel kan khelho tawh a, hei vang hian player-te kan inhrechiang tawh em em. Season hmasa kha chuan hliam vangin kan talbuai a, a hma chiah season-ah erawh kan khel ṭha a, nomawi pawh kan chawiho reng a ni.

"Tuna ka sawi theih chu player-te kan inhre-chiangin, goal khung tur leh hnehna chan tumin kan inpui tawn nasa em em a ni," a ti a, team boruak ṭha chu an result ṭhat chhan a nih thu a sawi.

Liverpool hian league-ah point 31 hmuin table-ah pathumna an ni mek a, hmahruaitu Chelsea chu match 14 ve ve khelh tawhah point hnih chiahin an phak lo mek - zanin dar 8:30-ah Diogo Jota club hlui Wolverhampton Wanderers an lenchilh ang.

Champions League lamah pawh Reds hian match nga an khelhah hnehna an chang vek a, group of death tia an chhal group B-ah FC Porto, AC Milan leh Atlético Madrid te hneh vekin last 16 an lut chiang tawh - match khat khelh hmabak erawh an la nei a, AC Milan an la lenchilh leh dawn.