Jamshedpur leh Hyderabad inhnehtawk

Ningani zan Indian Super League inkhelah Jamshedpur FC tan Greg Stewart chuan goal hmahruai khung mah se a team a chakpui zo lo a, Bartholomew Ogbeche chuan Hyderabad tana si phurh sutin 1-1 in an inhnehtawk.

Men of Steel (Jamshedpur sawina) tan Stewart chu player langsar a ni a, season hmasa thlenga Rangers tana la khel forward hian duhthala Hyderabad tlarhnung a pal darh hnuah ṭha takin shot nei mah se post a pet per a, a vanduai.

Birmingham City tan pawha lo khel tawh forward hian Hyderabad tlarhnung tihsual zar zoin Nerjus Valskis tan a siamsak bawk a, mahse, Lithuania international hian a chance neih a chhawr thei bik tlat lo.

Minute 41-naah erawh Stewart a vanduai tawh lo. Kum 31 mi forward hian throw-in aṭanga ball kal chu ṭha taka a lakluh hnuah goal-ah mawi zetin a thlawh lut a, Hyderabad an hawihai.

Mahse, chawlhlawkah Hyde-rabad coach Manuel Roca-a'n thu ṭha a sawi tih a lang a, second half-ah Hyderabad an khel ṭha sawt - minute 54-naah Ogbeche chuan si phurh sutna goal a khung ta nge nge a, hun tawp thlengin goal dang erawh a lut tawh lo.

Jamshedpur tan tlarhnungah Laldinliana Renthlei leh Ricky Lallawmawma ten inkhel bul ṭanin minute 90 an khel tluan a, an khel ṭha hle - Hyderabad lamah erawh Mizo player inlan an awm lo thung.

Zanin ISL-ah inkhel pahnih a awm dawn a, tun season-a chak la tawng lo NorthEast United chuan dar 7:30-ah FC Goa an hmachhawn ang. Highlander hian Emanuel Lalchhanchhuaha, Joe Zoherliana, Laldanmawia Ralte, Lalkhawpuimawia, Rochharzela leh William Lalnunfela te chu Mizo player an kawl a ni a, Goan club hian Lalhmangaihsanga an nei thung.

Edmund Lalrindika khelhna Bengaluru chu zanin dar 9:30-ah Mumbai City nen an inkhel dawn a, Mumbai club hian Hmingthanmawia (Valpuia) leh Lalengmawia (Apuia) te an kawl.

Pathianni zan dar 7:30-ah K. Lalṭhathanga khelhna Kerala Blasters leh Odisha an inkhel dawn a, Odisha hian Lalhrezuala Sailung, Lalruatthara, Isaac Vanmalsawma, Isak Vanlalruatfela, Paul Ramfangzauva, CVL Remtluanga, Daniel Lalhlimpuia leh Jerry Mawihmingthanga te an nei a, Mizo player pariat ngawt an kawl!

Inkhel Result
Jamshedpur FC 1 - 1 Hyderabad FC
JFC: Greg Stewart 41'
HYD: Bartholomew Ogbeche 56'

Zanin Inkhel Tur
NorthEast United 7:30 PM FC Goa
Bengaluru FC 9:30 PM Mumbai City

December 5, Pathianni
Kerala Blasters 7:30 PM Odisha FC

*Nizana Chennaiyin leh East Bengal inkhel result a zirin table hi la danglam leh thei a ni.