Conte-a Spurs league-ah la tlawm lo

Antonio Conte enkawlna hnuaia league match thum an khelhah Tottenham Hotspur an la tlawm lo - Ningani zan pawh khan Spurs hian Brentford chu 2-0 in an hneh a, Sergi Canos (own goal) leh Son Heung-min-a goal khung hmangin hnehna an chang.

Spurs hian minute 12-na lekah goal hmahruai an khung a, Son-a cross aṭanga ball kal chu Pontus Jansson chuan tauh chhuah tum mah se Ben Davies a per a, a per lehlam hian right wing-back Sergi Canos per lehin a goal.

Minute 65-naah Son-a'n goal a khung ve leh a, Sergio Reguilon-a siamsak chu awlsam takin goal-ah a chantir. Spurs an khel ṭha tluan chhuak zak a, Brentford tan Ivan Toney-a'n holam taka shot a neih ve tih loh chu chance sawi tur a awm meuh lo.

Kar hmasa lawk khan Spurs hian Europa Conference League-ah club satliah NS Mura chu 2-1 in an ngam lo a, Conte-a'n kawng tinrenga hmasawn an mamawh thu a sawi - a sawi ang ngeiin hmasawnna hmuh tur a awm.

Hetihrual hian striker chhuanvawr Harry Kane-a'n goal a la khung lo chhunzawm zel a, kum 28 mi striker hian tun season Premier League-ah match 12 khel tawhin goal khat chiah a la khung.

Kane hian Brentford keeper Alvaro Fernandez chauh a hmachhawn chungin a pet goal thei lo a, mahni hma sial deuh se shot mai theih turah Lucas Moura tan a siamsak bawk.

Spurs boss Conte chuan, "Kane a khel ṭha a, goal khungna remchang pawh a nei. Mahse, goalkeeper kha a khel ṭha em a ni. Ani ang player inpe leh thawkrim ka neih avangin ka lawm takzet.

"Kane hi a goal khung leh khung lohah a buai lo a, hetianga a khelh reng chuan ka lawm tho ang. Tottenham hi kan ngaihtuah hmasak ber tur a ni a, Harry pawh hian goal tam tak a la khung ang," a ti.

Spurs hian Pathianni zan dar 7:30-ah league match khel turin Norwich City an mikhual ang.