Bundesliga palian an intawng dawn

Zanin dar 11:00 hian Bundesliga inkhel hmuhnawm leh pawimawh bik a awm dawn. Borussia Dortmund chuan Signal Iduna Park-ah Bayern Munich an lo mikhual dawn a, striker ropui Robert Lewandowski leh Erling Braut Haaland inbeihna ang pawhin a sawi theih ang.

Champion lai Bayern hian match 13 an khelh aṭanga point 31 hmuin hma an hruai mek a, an hnuai chiaha awm chu Dortmund hi an ni - an inkarah point khat chauh a awm, zanin inkhel result a zirin hmahruaitu pawh an inthlak thei dawn tihna a ni.

Buaina a awm
German ramah Covid-19 a hluar thar leh a, stadium khata mipui pungkhawm ṭhin pawh tih tlem a ngai leh ta. Mipui 81,365 zet lenna Signal Iduna Park-ah pawh zanin atan chuan mi 15,000 chauh an lut thei dawn.

Kar hmasa lama RB Leipzig leh Bayer Leverkusen te inkhel pawh a hmunah entu an awm thei lo. German Chancellor Angela chuan inkaihhruaina siam thar a nih tur thu a sawi a, hri leng danna la la lo tan pawn chhuah a harsa zual tura ngaih a ni.

Dortmund chuan thuchhuah siamin, "German rama stadium lian ber Signal Iduna Park-ah hian mipui 81,365 kan leng, tun ṭum atan chuan mi 15,000 chauh an lut thei ang, hei hi stadium-a mipui leng zat aṭanga chhut chuan 18.4% a ni," an ti.

Khawvel huap pawhin Dortmund hi fans nei ṭha leh a hmuna inkhel entu ngah an ni a, fans puihna an dawng ṭha ṭhin hle. Inkhel pawimawh bika stadium an khat thei lo tur hi player leh club neitu lam tan a uiawm khawp ang.

Haaland a dam
Hliam vangin thla khat chuang a chawl a, tunah chuan Haaland a dam leh tawh. League match an khelh hnuhnung berah khan bench aṭanga lutin goal a khung leh nghal, zaninah chuan a tir aṭangin a khel nghal thei dawn.

Kum 21 mi Haaland hian Bundesliga goal 10 khung turin match 50 bak a mamawh lo, German football inelna sang bera goal 50 khung tura match mamawh tlem ber a ni; Bayern lakah pawh a goal khung thiam hi hman chhuah a tum ang.

Season dangah pawh Dortmund hian a tir lamah chuan Bayern hi a elphak thuak thuak ṭhin, mahse season chawhnu lamah chuan Bavarians hi an phak lo ṭhin viau, club pahnih intawnah a chak lo zawk an nih ṭhin bawk avangin champion an harsat.

Marco Rose-a enkawl Dortmund-in kuminah pawh bul an ṭan fuh hle, champion tum ngam tur khawpin tunah hian an kal mek. Season dang anga zuih ral leh an duh lo a nih chuan anmahni mualah tal chuan Bayern an hneh theih hi a pawimawh ang.

A pawi thei
Dortmund hi an chak lo a nih chuan Bayern an kal fal leh dawn tihna a ni a, hei hian nghawng na tak a nei chhunzawm thei dawn. Champion châk tan Dortmund hi awm rengna tlak a ni em, tih zawhna pawh a piang chhuak leh ngei ang.

Champion châk zingah Haaland a tel. Nakkum nipui bazar hunah chuan Haaland-a hi a contract neih lai angin lei chhuah theih a ni tawh dawn a, tun hma lam angin Bayern lakah an striker hi an chan leh daih a nih pawhin a mak lo ang - thil thleng thei a ni tlat.

Lewandowski pawh hi Dortmund aṭanga Bayern zawmtu a ni tih hria ila. Kum 33 mi Lewy hian chona thar hmachhawn a duh thu a lo sawi zauh tawh, a seilenna hmun a nih miau loh avangin engtik niah emaw chuan Allianz Arena a chhuahsan ang tih a rin ngam.

Dortmund tan chuan Haaland chauh ni loin, an player ṭha dangte pawh chelh tur chuan Bundesliga champion nih theih a pawimawh. German champion an nih theihna tur kawng hnai leh pawimawh chu an mikhual Bayern hneh hi a ni ang.

Hliam an tam
Dortmund tana beiseina siamtu pakhat chu an khingpui Bayern Munich hi hliam vangin an buai mek. Midfielder pawimawh Leon Goretzka-a'n training a la zawm lo, player pawimawh Joshua Kimmich chu hri leng vanga khung hran a la ni.

Bayern manager Julian Nagelsmann tan Kimmich hmun ruak luah khattu zawn hi a harsa dawn, match dangah chuan Goretzka hi Kimmich khelhna hmunah a khelhtir ṭhin - tunah chuan German midfielder pawh hi 100% a dam a ni tlat lo.

Midfield lai luah lumtu hi an buaina a ni dawn a, mawhphurhna la thei tur zingah Marc Roca chu hming langsar a ni ang. Spanish midfielder hian tun season-ah league match la khel lo mah se Champions League-ah ṭha takin mawhphurhna a hlen chhuak.

German manager Nagelsmann-a'n Roca a ring ngam lo a nih pawhin Marcel Sabitzer chu chhawr theih tur zinga mi a ni. Austrian midfielder hi chuan league match vawi riat a khelh tawh avangin a ring ngam zawk a nih pawhin a mak lo ang.