Dembele-a'n contract thar la ziak lo

Barcelona coach Xavi-a'n hliam nei ngun mah se Ousmane Dembele chungah beiseina a nei sang a, contract thar pawh ziahpui a duh - mahse, an beisei ang erawhin a kaltluang lo.

French forward hi season tawp rualin a contract a zo tawh dawn a, Catalan club hian an player hi a thlawna an chân mai loh nan contract thar ziahpui an duh.

Barca president Joan Laporta chuan, "Kan duh aiin inbiakna a kal muang a, chiang takin engmah sawi theih a la awm lo. Dembele hi kan tan player pawimawh a ni a, club tan pek theih tam tak a la nei.

"Barca-ah a cham zel chuan he team kaihruaitu pawimawh hi a nih theih kan ring a, Nou Camp-a a cham ngei theih nan hma kan la zel ang. Contract thar ziah hi chu muan deuh chang awm mah se a kalphung ve pakhat a ni a, Dembele hi kan chelh theih ngei ka beisei," a ti.

Kum 24 mi Dembele hian kum 2017 khan Barca hi a zawm a, hliamin a tlakbuak ve reng avangin inelna hrang hrangah match 121 chiah khelin goal 30 a khung a, tun season-ah pawh match thum chauh a la khel!

Mahse, Barca coach thar Xavi-a'n French forward lakah beiseina sang tak a nei a, chelh an tum - Catalan club hian zanin dar 8:45-ah league match an khel dawn a, Real Betis an mikhual ang.

Barca hian Xavi hnuaiah league match hnih khel tawhin Espanyol (1-0) leh Villarreal (1-3) an hneh ve ve a, heti chung hian table-ah pasarihna an ni mek - hmahruaitu Real Madrid chu match khata khel tlem zawk chungin point 13 laiin an phak lo mek a, Real hian zanin dar 1:30-ah Real Sociedad an lenchilh dawn thung.