Neymar hliam a pawi - Pochettino

Paris Saint-Germain manager Mauricio Pochettino chuan an ṭhat dan bera khelh chhuah an la harsat thu a sawi a, an player pawimawh zinga mi Neymar hliam leh ta chu pawi a tih thu a sawi bawk.

French Ligue 1 lamah PSG hian fal takin hma an hruai mek, amaherawhchu an khelh chhuah danah beisei an phak meuh lo. A bik takin league-a an hmachhawn team nem zawk tur lakah goal an khung tam tawk lo.

Lionel Messi, Kylian Mbappe leh Neymar te nei chunga goal an khung tam tawk lo hi a mak. Tunah chuan Neymar a chawlh rih a ngai a, a hmun ruakah Angel di Maria a awm thung ang - an la ṭha tawk rem rem hle.

Poch chuan, "Nipui bazarah khan player kan in lei khawm nual a, ṭhenkhat chu tun hnaiah an inlan ṭan thei chauh. Team nghet leh in man tak ni tur chuan nghah rei a ngai ve bawk, tunah chuan chumi tur chuan kawng dik kan zawh ṭan.

"Boruak a ṭhat lai takin Neymar a inhliam leh hlauh a, kan vanduai ve bawk a ni. Nuam ti taka inkhel ṭhin an hliam lai hmuh hi chu a hrehawm," a ti. Defender Sergio Ramos erawh a chhawr chhunzawm thei tawh ang.

Ramos hi hliam vangin a chawl char char a, tun hnaiah lo kir ve chauhin Paris club tan match khat chauh a la khel. Argentina manager Poch sawi ang hian nipui bazara a player leikhawm te hi an la khel ho thei lo, hliam vangin an buai ngun ta hle a ni.

Zanin dar 1:30-ah PSG hian league match khel turin Lens an lenchilh ang.