Star rual Belgium aia star France

Danglamna goal khat
France-in goal venhim phawt a, counter attack hmanga goal nawr pawi an ti lo a, kum 19 mi Kylian Mbappe tlan chakna chu an hmachhuan a ni. Belgium erawhin Eden Hazard, Kevin De Bruyne leh Romelu Lukaku hmangin an nawr a, Manchester United striker chu mualsirah awm tawh loin mual lai aṭangin a nawr tawh.

Chelsea winger Hazard chu mual vei lamah a hnawksak a, inkhelh ṭantirh lamah ṭum hnih hlauhawm takin a pet a, defender Toby Alderweireld pet chu France keeper Hugo Lloris-a'n ṭha takin a dang bawk. Belgium chu ball chang tam zawk an ni a, France wing back Benjamin Pavard-a'n goal khungna hun ṭha a neih chu Belgian keeper Thibaut Courtois-a'n a dang ṭha ve ve. Keeper ṭha pahnihin first half-ah goal an chhuah lo.

Second half minute 51-naah France tan Antoine Griezmann-a corner pet chu Samuel Umtiti-a'n a tauh lut a, Uruguay an hneh ṭum pawhin Griezmann-a freekick pet chu Raphael Varane-a'n a tauh lut tawh–Les Bleus goal khung dan hi vannei a ni lo.

France bawk an hlauhawm zui a, Mbappe 'magic-pass' chu Olivier Giroud-a'n a pet goal thei lo. Belgium chungnung mah se Romelu Lukaku chu dah ṭhatin a awm a, Japan lama tauh lut tu Marouane Fellaini-a'n a hun ṭha neih chu goal zawnah a tauh thei lo. Les Bleus tan substitute Corentin Tolisso-a'n goal khung belhna hun ṭha a neih chu Courtois-a'n a dan sak a, 1-0 in inkhel a tawp.

Belgium manager Roberto Martinez chuan, "Team pahnih danglamna chu dead ball pakhat chauh a ni," tiin a sawi a, dikna chen awm mah se Everton boss hlui chuan tawnhriat ngah zawk Deschamps a ngam lo tih khelmualah a lang.

Deschamps a enkawl France
Kum 20 liam ta khan France-in an ram Paris-ah Brazil 3-0 in an hneh a, a vawi khat nan World Cup nomawi an chawi. Hemi ṭuma Les Bleus captain Didier Deschamps hi tun ṭuma coach a ni a, Brazilian Mario Zagallo leh Germany legend Franz Beckenbauer te hnung zuiin player leh manager nichunga champion theihna hun ṭha a nei mek.

A inkhelh hun laiin Deschamps hi holding midfielder a ni a, game mawi aiin khelh dan phung nghet chu a duh dan a ni a, France team khelh dan hmang pawh a ni lehzel. Manchester United legend Eric Cantona chuan Deschamps hi a thiam dan aṭanga tehin waterboy hminglem a pe.

Amaherawhchu, England-in World Cup an champion kuma piang Cantona hi ram tan sulhnu thlir chuan Deschamps laka ṭawng uang tur a ni lo. France-in European Champioship-a final an thlen hnu kum hnihnaa Deschamps-a hoin World Cup-ah final a lut a, Cantona-a'n 'waterboy' a tih ang chi player N’Golo Kante leh Blaise Matuidi te chu France chakna thahrui an ni.

France boss Didier Deschamps chuan, "A pawimawh ber chu Pathiannia kan khelh tur hi a ni a, kum hnih liam ta khan final hi ka tem tawh a, chak loh hrehawm zia ka hria. Final-a chak zawh leh si loh chuan tuna semifinal kan chak hian awmzia a awm lo ang. Min ṭantute lawmna kan siam thei hi ka lawm a, Pathianniah tuna an lawmna aia nasa hi pek kan tum a ni," tiin final a pawimawh thu a sawi.

Deschamps chuan, "Tuna ka player-te hi kum hnih emaw kum li hnuah chuan an ṭha lehzual ang. Chutihrualin tunah hian ram dang kan elpha tawh a, kan thil tih apiang tidik lo mah ila hmasawnna chu a awm a ni. Ka player-te rilru put hmang hi ka fak a, tuna kan rilru puthmangah chuan tlang sang zawk pawh kan lawn thei ang," tiin a player-te chungchang a sawi.

France hian tun World Cup-ah game mawi ber an khel lo a, amaherawhchu match ruk an khelh aṭangin match liah goal an chhuah lo a, squad an neih chhah bawk avangin champion tura rinkai an ni.