A thiam pali a hriat

Wimbledon khelh mekah hmeichhe singles semifinal khel tur a hriat kim tawh a, world number 1 hlui Serena Williams leh Angelique Kerber te bakah Jelena Ostapenko leh Julia Gorges ten quarterfinal an paltlang.

Thawhleh zan All England Club-a inkhelah Grand Slam vawi 23 champion tawh Serena-i'n Camila Giorgi chu 3-6, 6-3, 6-4 in a hneh a, world number 181 Serena hian tun Wimbledon biak a vawi khat nan set hloh ve mah se a vawi 11 nana semifinal lut turin harsatna a tawk lo. Grass court inelna lianah hian semifinal lut thei zinga ranking hniam ber a ni.

Hmeichhe tennis star zingah Belgium nu Kim Clijsters leh Australian nu pahnih Evonne Goolagong Cawley leh Margaret Court te fa an neih hnuah Grand Slam nomawi an chawi leh thei a, player ropui pathum hnung zui turin Serena tan match hnih chak bak a ngai tawh lo.

Wimbledon vawi sarih champion tawh Serena chuan, "Fa ka neih hnua tournament pali ka khelhna chiah a ni a, ka tum ram thleng tur chuan la harsa dawn hle mah se tihtawp ka chhuah ang. Nitin a hma aiin ka khel ṭha zel a, hei vang hian beiseina chu ka nei a ni," tiin a sawi.

American star Serena hian zaninah Julia Gorges a hmachawn leh dawn a, seeded 13-na Gorges hian Kiki Bertens lakah set hmasa ber hloh mah se darkar hnih deuhthaw an khelh hnuah 3-6, 7-5, 6-1 in a hneh let a, final lut tur erawh chuan a hna a hautak tawh dawn hle.

Kerber a tlang

Quarterfinal inkhel dangah seeded 11-na Angelique Kerber chuan Daria Kasatkina lakah 6-3, 7-5 in hnehna a chang. Player la dam zingah Kerber hi seeded sang ber a ni tawh a, set khatna thunun viau mah se set hnihnaah erawh an inkhel tawh viau. German nula hian match point vawi sarih a hmuh naah a point hnuhnung ber a hmu thei chauh a ni.

Grand Slam vawi hnih champion tawh Kerber hian season hmasa French Open champion Jelena Ostapenko a tum leh dawn. Latvian tennis player zinga major title la thei hmasa ber Ostapenko hian Dominika Cibulkova chu 7-5, 6-4 in a lo hneh ve bawk–set hloh miah loa semifinal lut thei a nih avangin Kerber tan awlsam tana nuai liam mai theih tur chi a ni lo ang.

Kum 30 mi Kerber chuan, "A nihna takah chuan match point vawi thum vel hmuh tawh hnua chak nghal mai loh chuan rilru a buai deuh ṭhin. Kan pahnih khan kan khel ṭha em em a, a tawp thlenga theihtawp kan chhuah dun avang khan entu lam pawh an mit a tlei ngeiin ka ring," tiin a sawi.