Juventus-ah Ronaldo a chiang ta

Season hman zawh tak Champions League quarterfinal-ah Juventus-in Real Madrid an mikhual a, 3-0 in an tlawm. He inkhela goal hnih khungtu Cristiano Ronaldo-a'n bicycle kick hmangin goal ropui a khung a, he goal avang hian Juventus fan-ten ding chungin zahna an lantir hial.

April thla lawka an khingpui player, a thiam chungchuan em avanga zahna chibai an buk hi tunah chuan kut phar chungin an player 'thar' angin an lawm thei ta - Thawhlehni zan khan Juventus leh Real Madrid chuan Cristiano Ronaldo man chungchangah an inrem thu an puang a, Portugal captain hian pound maktaduai 99.2-in Italian champion hi a zawm ang.

Juventus hian July 2016 khan Gonzalo Higuain chu Napoli aṭangin an player manto ber ni turin pound maktaduai 75.3-in an lalut a, Argentine stri­ker man zat hi a rawn khum ta a ni.

Manchester United forward hlui hi khawvela player manto palina a ni nghal bawk a, pound maktaduai 200 man Neymar, 166 man (ni mai tur) Kylian Mbappe leh 142 man Philippe Coutinho te chu ani aia manto an ni. Kum 33 mi forward hian kum li chhung atan contract a ziak a, kar khatah £500,000 a hlawh ang.

Real Ropuina Ronaldo

Ronaldo hian July 2009 khan Manchester United aṭang­in Real Madrid hi a hunlaia player manto ber ni turin pound maktaduai 80-in a zawm. Santiago Bernabeu-a phochhuah a nih ṭumin fans 80,000 vel an pungkhawm a, Napoli-in Diego Maradona an lakluh ṭuma fans 75,000 punkhawm a khum.

Khelmual lamah pawh Ronaldo a ropui chhunzawm a, Spanish club tan match 438 khelin goal 450 a khung sak a, club record a ni. Season nga liam ta chhung khan Champions League-ah vawi li ngawt a champion pui a, La Liga (2), Copa del Rey (2), Spanish Super Cup (2), UEFA Super Cup (2) leh Club World Cup (3)-ah te a champion bawk.

Khawvela footballer ṭha ber chawimawina Ballon D'Or chu kum 2008, 2013, 2014, 2016 leh 2017-ah te khan a dawng. Real-ah season kua hun a hman chhungin goal 30 khung tlin loh season a nei lo. 2009-10 khan goal 33 a khung a, match 35 chiah a khel thung. Season khata goal a khung hnem ber ṭum chu 2014-15 khan a ni a, match 54 a khelhah goal 61 a khung.

Real chuan an player ropui hi thlahin, "Real Madrid tan chuan Ronaldo hi player ropui tak a ni reng tawh dawn a ni. Khawvela player ṭha ber a nihzia pholang a, kan hun tawn duhawm ber zinga mi min tawnpuitu hnenah hian lawmthu kan sawi a, Real Madrid hi i tan chuan i 'IN' a ni reng dawn a ni," an ti.

Real hmabak

Real-in an club player ropui ber tia chhal ngam an chan a, zawhna awm chu Ronaldo hmun ruak luah turin tu nge an lakluh ang, tih hi a ni. Real hian manager thar Julen Lopetegui hnuaiah insiamṭhat an tum mek a, hming ri ring ber chu Neymar a ni.

Paris St-Germain forward hi player induh tawk ve tak a ni a, 'kei ka ni' inti ve tawk Ronaldo nen dressing room khata dah chi an ni lo - Portuguese forward hian Real-in Neymar an beisei thu a hriat hian chhuah a duh a, Juventus a pan ta niin khawthlang media-te chuan an tarlang hial.

Hriatreng atana ṭha erawh Neymar hi Barcelona player hlui a ni a, Real hi a pan a nih ngat chuan club pahnih inkar boruak a sang lehzual ang. Hetihrual hian PSG-a Neymar-a khelhpui Kylian Mbappe hming pawh lam rik a ni a, Eden Hazard leh Harry Kane pawh sawi tel an ni.

Italian football expert James Horncastle chuan, "Real hian Ronaldo thlakna tur nei loin an player neih ṭhat ber hi an kaltir mai lo ang. Neymar nen hian an inkar boruaka ri ret ret a awmna hi a rei tawh a, hei hi Ronaldo pawhin hriain chhuah a duh a ni," tiin a sawi.