Sampaoli hma hun ennawn dawn

Jorge Sampaoli chu Argentina coach a ni zui zel dawn em tih a la chiang thei lo a, Argentine manager dinhmun hi July thla tawpah ennawn a ni ang.

Kum 58 mi Sampaoli hian an ram chu World Cup-ah kaihruaiin an tum ram an thleng phak lo a, harsa takain group stage paltlang mah se last 16-ah France 4-3 in an ngam lo. Lionel Messi leh a ṭhian ten beisei an phak lo hle.

Tunkar tir khan Sampaoli hian Argentine Football Association (AFA) president Claudio Tapia leh vice president Daniel Angelici te a hmu a, July 28 aṭanga khelh tur under 20 tournament-ah chuan an ram hi a enkawl dawn - senior team lama a dinhmun erawh a la chiang lo.

May 2017 aṭang khan Sam­paoli-a'n Argentina a enkawl ṭan a, match 15 a khelh puiah vawi sarih chakin ṭum li an chak lo a, vawi li dang chu an khingpuite nen an inhnehtawk.

Argentina-a sports chanchinbu lian pakhat 'Ole' chuan an manger chungchangah mipui ngaihdan an la a, vote thlaktu 100,000 zinga 80% zet chuan Sampaoli hi bang turin an duh.