Arsenal player thar Torreira

Football nipui bazar lai a ni a, team indin thar tum Arsenal an in lei belh zel. Gunners hian an player thar palina ni turin Lucas Torreira chu Sampdoria aṭangin kum nga chhung atan an lalut a, Uruguay international midfielder hi pound maktaduai 26 man a ni.

Kum 22 mi Torreira hian FIFA World Cup-ah khan match nga khelin, an ramin quarterfinal an thlennaah khan a inlan kim vek. Thawhlehni khan London Colney training complex-ah medical test a nei zo tawh a, World Cup chawlh an hman zawh hnu August thla tir aṭangin a club thar hi a zawm ang.

Arsenal manager thar Unai Emery chuan, "Player naupang leh theihna nei sang Lucas Torreira kan lalut, ani hi a kum la tam lo mah se tawnhriat a ngah tawh a, hmasawn zel duh mi a ni bawk," tiin Serie A club tana season hnih chhunga match 71 khel thei player chungchang a sawi.

Valencia leh Paris St-Germain manager hlui Emery hian Gunners thuam chak a tum nasa hle a, goalkeeper Bernd Leno, defender Stephan Lichtsteiner leh Sokratis Papastathopoulos te a lalut tawh. France under-20 international Matteo Guendouzi pawh nimin tlai khan Lorient aṭangin an lalut bawk a ni.