World Cup khel zo hlim Acosta-a'n India a pan

East Bengal chuan Quess Corp nena thawhhona an tih chian hnu lawkah pawisa an nei tih an pholang a, World Cup 2018-a Costa Rica tana group stage match thum zawng zawnga inlan kim vek Johnny Acosta an lalut.

Kum 34 mi defender hian tawnhriat a ngah tawh a, Costa Rica tan match 71-ah inlan tawhin East Bengal hian Colombian club ṭha Rionegro Aguilas aṭangin an lalut a, kum khatah nuai 136 vel a hlawh dawn a ni.

Acosta hi 2014 World Cup-ah pawh khan Costa Rica aiawhin a lo feh chhuak tawh a, quarterfinal hial an thleng. Kumin World Cup-ah pawh Group E-ah Brazil, Switzerland leh Serbia te kha a hmachhawn kim vek a, last 16 erawh an lut ta lo.

World Cup 2018-a ball clea­rance vawi riat neia, an khing­puite ball ken lai vawi 11 chhuhsaktu Acosta chuan, "East Bengal hi India rama football club ṭha ber zinga mi a ni a, ka club thar chungah hian lawmthu ka sawi a ni. Ka tum ber chu Indian footballer te tih phur a, puih a ni a, hetihrual hian nomawi chawi ka tum bawk," a ti.

Indian football-ah ram pawn player langsar tak tak an pem lut zel a, Acosta bakah hian World Cup khelh zawh taka Iran captain Masoud Shojaei, Panama midfielder pawimawh Gabriel Gomez, Iceland defender Kari Arnason leh Uruguay midfielder Cristian Rodriguez te hming pawh lamrik a ni.

Iran captain Masoud hi FC Goa nen sawizawm an ni a, Goan club hian Manuel Lanzarote thlakna turin lakluh an duh niin an sawi. Greek club ṭha AEK Athens midfielder hian 2013-14 khan Spanish club Las Palmas tan a lo khel tawh a, hetih hunlaia an coach chu tuna FC Goa coach Sergio Lobera hi niin sawizawm an ni hi a mak lo.

Panama midfielder Gomez hi an ram team tana inlan hnem thei ber niin vawi 141 a inlan a, group stage-ah Belgium, England leh Tunisia a hmachhawn kim vek. Mahse, Gabriel hian kum thum chhung atan contract ziah a duh a, eng club nge a zawm dawn a la chiang lo.

Iceland defender Kari Arnason hi Pune City nen an indawr mek a, ani hian Argentina leh Nigeria an hmachhawn ṭum khan Iceland tan inkhel bul a ṭan ve ve.

Uruguay midfielder Cristian Rodriguez beisei erawh a sang hret a, ram tana match 109 khel tawh hian kum khatah vaibelchhe 13 hlawh a phut avang­in eng club-ah nge a kal dawn a la chiang lo.